- PC Lalthakima
(Joseph Zaihminthanga Tribute Concert nei tura inbuatsaihna kal mekah amah promote-tu langsar in an intawn dan ngaihnawm tak a ziah hi chhawpchhuah a ni e. TT)
Kum 2002 fur lai a ni a. Ruah phingphisiau karah Bethlehem venga kan chenna In ah chuan rawlthar pahnih hi pawr chip chep in an rawn lut a, ‘Hei hi Pu Pc.Lathakima, Rimawi Khawvel Chanchinbu Editor te In ani em?’ rawn tiin, Ni e..tiin Inchhunga lut turin kan lo tia. A hmel en reng rengin ainthlahrung tih a hriat. Ti hian a chanchin leh alo kal chhan a sawi ta a.
Joseph Zaihmingthanga a nih thu leh Darlawn khaw chhuak an nih thu, tunah Ramthar veng Aizawla an khawsak thu a bultan in zai leh rimawi a tui thu a sawi ta a. Art & Culture Department hnuai IMFA a training chhuak a nih thu leh Mizoram pum huap solo competition a lawmman 3-na dawngtu a nih thu te, Hla a phuah nual thu leh chung a hlaphuah te chu Album a siam a duh thu te sawiin, sum leh pai a harsat vang leh thildang vanga producer tur a zawn thu, a hlawhchham zel thu sawiin, produce sak turin a huaisenna zawng zawng sawm khawm in min ngen ta a ni.
Kei chuan a zai ka la hriat ngai loh vangin demo a neih leh neih loh ka zawt a, hla pali vel a neih thu min hrilh in ka han ngaithla chhin a, Gospel hla alo ni a. Eng album nge siam i duh..tia ka zawh chuan love song album ati lawi si, ka buai tan ta deuh. Tichuan, ti hian thutlukna hmasa ka siampui ta a. Kolasib nula zaithiam Maengi album siam kan tum lai a nih vangin an pahnih duet album siam phawt ang tiin.
Mahse, a hla thenkhat music track siama mipui hma a an zai chhuah ve tak zauh zauh chuan rinphak bakin min an lo hlut a. Vanlalsailova vanglai a ni a, a ni’n geust artist ah te a lo sawm a, amah pawh a improve chak hle. A single album siam chakin ka nupui leh ka farnu te a lo hmin ta der a, a tawi zawngin a single album hmasa ber Tah chuan a leng…tih chu kan siam ta nge nge a ni.
Sawi tawh angin Vanlalsailova vanglai tak a ni a, miin min huphurhpui hle maia, I huaisen mang e aw…min ti bawng bawng tu pawh ka tawng nual. Mahse kei chu ka confi..tlat a, Sailova fans tam tak kan chhuh anga, kan khum lo a nih pawh in, kan tluk tur ani..tiin ka chhang maia, chumi tur chuan tan pawh kan tang teh e. Amah in a tum ruha, a fight nasa bawka, insum ngai zawng zawng a insum a, a in sengso nasa hle. Sum leh paiah a duham lo a, amah tawiawmtu zaithiam te a kian zel thei. Kha kha a hlawhtlinna bul niin ka hria. Mizoram khaw lian deuh chinah concert lohna kan nei meuh lo.
Pathian lam hawia, rawngbawl hna a thawh hnu ah pawh a nungchang mawi leh ze ngaihawm chhawm zelin, phawvuak lo takin Pathian rawng tih tak meuh in a bawl a, zai leh fakhla phuah a bansan chuang lo.
Ka in rin hma leh amah pawh a inrin aia hma a nih ka ring min boralsan ta thut maia, tuar viau tur leh ngai viau turin ka inring hman lo. A boral leh vui ni te khan ka hul tlat a, mite angin ka kur lem lo. Mahse, a rei telh telh a, kan sulhnu te fangin chhuikir chang a tam a, ka tuar dawn choh pawh ani mahna. A boral thlengin ka hming tello in KA PU min ti thlap a, min hmusit in min zahpui ngailo. A duhaisam kan tih hman tak loh erawh… Pathian hre lo leh khawvel taka concert hlimhlawp kan lo bawl tawhna hmun ah te Pathian hnena thuphachawina leh ngaihdam dilna neih dun a rawt kha..a hreawm zawngin ka hre reng dawn ta a nih hi.
Aw le, a mah zahna, chawimawina leh hriatrengna Tribute Concert neih a tul ta mai leh chumi a mawh latu bera tan alo tul ta hi hriatthiam harsa ka va ti em!!! Chu hun a ruang thlah champhaphak vawi 1-na May ni 8,2024 Nilai zana a rimawi zinkawng bultan na Vanapa Hall ah ngei lo tel vek turin a fans te thinlung takin ka sawm a che u.
“Hmangaihna mittui leh pangpar, i tan rimtui ah ka hlan che hi, tunah a thlawn mai an chang si, tawrhthiam a har aw a na…Hrilh ka hai ngei e Lunglam ka vai….”