Khaw ro lai leh lum hun April thla kal mekah Mizoramah pawh thla dang aiin khua a lum chho tan a, hetihlai hian nikum ang emin khua a la lum lo, a ziaawm zawk niin a lang.
Directorate of Science & Technology hnuaia State meteorological centre in an chhinchhiah danin April thla tir ni 3 atang khan khua a luam chho tan a, Celsius degree 28 a kai chho a, hetihlai hian ruah tui te a tlak leh avangin khaw lum hi a ziaawm leh thin.
Ruah tui a tlak loh chuan khua a lum leh nghal zel a, April ni 13, ni 14, ni 16 leh ni 25 ah te Celsius degree 31 kai chho in, hmun hniam zawkah te chuan hei ai hian khaw lumna hi a nasa zawk a ni.
Hetihlai hian nikum aiin kuminah hian khaw lum dan hi a ziaawm zawk niin chhinchhiah a ni a. Kum liam ta 2023 chhunga khaw lum ber ni te chu April ni 16 ni 18 leh ni 19 te kha niin, Celsius degree 33 a kai chho a, nikum April thla bika khaw lum dan chawhrual chu Celsius degree 24.6 niin, kumin aiin a sang zawk fe a ni.
State meteorological centre chhinchhiah danin, kum 1985 atanga tun thlenga khaw lum ber kum chu kum 2017 kha niin, hemi kum April ni 13 khan Celsius degree 36.5 a kai a, hei hi Mizorama khaw lum ber ni a ni.