- Laiu Fachhai
He ziaktu hi ka nu lama ka pi bula seilian ka ni a, ka pi chuan tiang hian min hrilh thin: “Dawt sawiah mi i puh chuan, ‘ruk i ru’ tihna a ni a; ruk ruah mi i puh chuan, ‘tual i that’ tihna a ni a; tual thahah mi i puh chuan, ‘mihring i ni lo, ransa i ni’ tihna a ni. Chuvangin tumah dawt sawiah i puh tur a ni lo a, ruk ruah i puh tur a ni hek lo. Nang pawh dawt i sawi tur a ni lo a, ruk i ru tur a ni hek lo. Dawt chu a lo lang mai thin,” tihin. Hei hi ka pi, lehkha thiam lo, mahse mifing leh hla phuah thiam, philosophy leh zirtirna a ni a, a dik leh dik loh lam aimahin, dawt sawi leh dawt sawiah inpuh a that lohzia leh nghawng a neih thuizia min zirtirna a ni.
Mizoramah chuan kan political partyte hi Kristian intite awmkhawmna partyte an ni hlawm a, nimahsela kan political partyte leh politiciante hian awlsam tak leh inphal takin dawt sawiah an inpuh tawn ve ve thin a, an inpuh tawn mek a, an la inpuh tawn zel dawn niin a lang. Tu party nge dik ber a, tu politician nge dik ber tih pawh hriat a harsa tawh hle. Thu dik leh tha sawia an khingpuite an hneh theih dawn loha a lan chuan, dawt sawia inpuhna leh mimal nun insawichhiatna (character assassination) lamah an lut thin. Hetianga kan kal zel a nih chuan, kan politiciante hian ram ropui min dinpui ahnekin, “Dawtland” min dinpui palh ang tih a hlauhawm hle. Hetiang level vel politics, politician leh mipuite ni tawh lovin, hei aia tha zawk tur leh puitling zawk tur kan ni tawh asin maw le!
He thu ziaktu hian dik si, mahse nuihzatthlak bawk si, fiamthu thawnthu pakhat an sawi ka hre ve a. Pa pakhat hian naupang inhnial buai lai a hmu a. “Eng vangin nge khatiang khan in inhnial buai?” tihin a zawt a. Naupang pakhat chuan “Ka pu, dawt sawi intihsiakna kan nei a, he uite hi dawt sawi thiam ber hnena pek tur a ni a, dawt sawi thiam ber nihna an hauh vek si a, chuvangin inhnial buaina a chhuak ta a ni,” tihin a chhang a. Chu pa chuan, “Eng vangin nge chutiang chuan dawt sawi chu in intihsiak ngawt le, dawt sawi chu a tha lo asin,” a ti a. Naupangte chuan, “Ka pu, nang dawt i sawi ngai lo em ni?” tihin an zawt a. Chu pa chuan, “Ka sawi ngai lo,” a ti a. Naupangte chuan, “Ka pu, dawt sawi thiam ber pakhatna lawmman dawng tlak chu nangmah ngei hi i lo ni. Uite hi nangin nei ang che,” tihin uite chu an pe ta a, tihin. Chu naupangte tan chuan, “Dawt ka sawi ngai lo” tih chu dawt ngialngan a ni. Kan ramah pawh hian dawt sawi thiam ber pakhatna lawmman uite dawng thei tur kan awm teuh a rinawm.
Ni e, dawt sawi hi khawlohnaa din leh suala piang mihring nunzia pakhat a ni ve tlat a (Sam 51.5), chuvangin Isua tih lohah chuan, hmeichhe hrin zingah chuan naupangte atanga dawt sawi ngai lo an awm a rin awm lo. An awm pawhin an tam lo ang. Chutih laiin, Kristiante erawh chu mihring nunziaa nung tawh lova, Krista nunziaa nung tawh tur kan nih avangin kan danglam tur a ni a, kan danglam tur anga kan danglam theih lohna, a bikin party politics leh sum leh pai thilah dawt sawi pawi ti lotu Kristian kan la tam rihna hian, ngaituahna a ti kal thui thin chu a ni.
Fiamthu thawnthu dang leh chu, Intihlimna Dawt Sawi Club (Amateur Liars Club) chuan, intihlim nan dawt sawi intihsiakna a buatsaih a, politiciante erawh tel phal an ni ve lo. Hetiang hian politiciante tel ve an phal loh chhan chu tarlan a ni: “Politiciante chu professional liars (dawt sawi hi an eizawnna hnaa hmang) an ni a, chuvangin dawt sawi an thiam em em a, anni an tel ve chuan, intihlim nana dawt sawi thinte tan hnehna chance a awm dawn lo. Chuvangin politiciante chu intihlimna dawt sawi intisiaknaah chuan tel ve phalsak an ni lo,” tih a ni. Kan ramah pawh hian, intihlimna dawt sawi intisiaknaa tel pha lo tur politiciante kan lo kawl teuh mai thei a ni.
He fiamthu thawnthu hi tlânglâwn (generalization) fiamthu thawnthu a ni a, dawt sawi duh loh leh sawi loh politiciante an awm ve ngei ang. Dawt tel lova politics khelh theih lohna tur leh kal theih lohna tur chhan a awm lo a, dawt tel lova politics khelh leh kalpui chu Kristian politiciante nihna tur leh politics khelh dan tur a ni. Kristian politiciante chu an danglam tur a ni a, chutih laiin Kristian politician thenkhatten an danglam tur anga danglamna nei lo a, dawt sawi leh dawt sawiah politician dangte puh pawi tihna neih loh an ang mai thin hian ngaituahna a tikal thui thin hle a ni. Dawt sawiah inpuhna thenkhat hi chu party politics chhe mi ni berin a lang a, thenkhatah erawh chuan an inpuhna chu thudik a nihzia finfiahna a awm thin awm e. Politician leh dawt kal dun tirna thil tha lo a lo pianna chhan hi mipuiin a mawh kan phur lo, anmahni politiciante vang a ni, dawt sawiah an inpuh tawn thin avangin.
Eng vangin nge miten dawt an sawi thin? Naupangte chuan an duh zawng an neih theihna tur leh thil an tihsualin zilhauna leh hremna an tawk lohna turin dawt an sawi thin. Puitlingte erawh chuan, ringtute tiamin, dawt an sawi thinna chhan leh vang chi hrang hrang a awm ang. Hun leh hmun tamtakah chuan, harsatna leh hlauhawmna karah an sahimna turin miten dawt an sawi thin. “Pathian Ṭhian” tiha koh Abrahama (Jakoba 2.23) leh Pathian meuh pawh “Isaka Ṭiha” tiha koh Isaka (Gen 31.42) te pawhin, harsatna leh hlauhawm karah chuan dawt an sawi ve tlat a ni.
Abrahama khan a nupui Sari chu Aigupta lal Pharoah leh Philistia lal Abimeleka ten an laksak thei tih a hria a, chutia a nupui laksak theih tur chuan amah, a pasal chu an thah hmasak a ngai dawn a ni. Chuvangin a sahimna turin a nupui chu “Ka farnu a ni” tihin dawt a sawi a ni (Gen 12.10-20; 20.2-7). Khatih hun laia lalte kha an lal hle a, mi nupui an neihsak theihna turin an pasalte thah pawh pawi an tih loh hun lai a ni. Abrahama khan a nupui Sari kha, “Ka nupui a ni” a tih chuan, an laksak theihna turin amah kha an that thei a, “Ka farnu a ni” a tih erawh chuan, man leh mual pein a farnu chu an nei thei a ni. Lalte thu chu hnial theih rual a ni lo. Isaka pawh, a pa Abrahama angin, a nupui Rebeki chu “Ka farnu a ni” tihin Philistia lal Abimeleka hmaah dawt a sawi ve a ni (Gen 26.1-11). Heng thawnthute atangte hian, khatih hun laia hmeichhiate dinhmun hniamzia kan hmu tel bawk. Abrahama leh Isaka te khan mahni sahimna turin, an nupui, hmeichhiate chu midang kuta hlan (sacrifice) an pawi ti lo a ni.
Harsatna leh hlauhawmna tawk loh pawhin, hlawkna leh hamthatna (sum, hna, etc) hmuh duh vang te, mualpho leh zak hlauh avang te, hmelmate beih nan leh eltute hneh theihna atan miten dawt an sawi thin. Thlantlin a nih theihna tura political party leh politicianten an tihhlawhtlin theih loh tur thil an tiam thin te pawh hi dawt a nihna lai a awm ve. Society-in dawt sawi a lak serious lo a, dawt sawitute an phu tawka hrem an nih thin loh avangte pawhin miten dawt sawi leh ziak an hlau lo a, an zak lo bawk. Kritian intih si a, dawt sawi thin a nih chuan, Thlarau Thianghlim inkaihruai tir ringtu chak a nih loh vang a ni ang.
Dawt leh dawt inbeih changte a awm a, dawt mah ni se sawi nawn reng a nih chuan thudik anga ngaih hunte pawh a awm thin. A sawrkar berin sum hmanna Utilization Certificate (UC) siam hunah dawta phuahchawp UC siam pawi a ti loh phei chuan, mipuite dawt sawi loh tura han phut leh beisei chu awmze nei lo a ni. Mediate (print leh electronic mediate) pawh political party leh politician ṭan zawk an neih vang emaw, an inhralh theihna turin emaw, dawt pawlh thudik chanve thehdarhtu an ni thei bawk. Thudik chanve chu dawt muhlum ai pawhin a hlauhawm zawk e, tih thufingte pawh a awm kha maw.
Dawt var (dawt thiang leh tha) a awm em? Abrahama leh Isaka te pawhin an sahimna turin dawt an sawi tho a, chuvangin keini Kristiante pawh kan himna tur leh thatna tur a nih chuan dawt var sawi chu a pawi lutuk dawn em ni, tih ngaihdan leh sawite a awm thin. Thuthlung Hluia narrative (thawnthu) te hi Thuthlung Hlui Dan (Law) leh Thuthlung Thara Lal Isua zirtirnate atanga bêlh chian tur a ni a. Abrahama leh Isaka te dawt sawi kha Pathianin a pawmpuina thu Bibleah a awm lo. Lal Isuan, “In thu sawi chu ‘ni,’ emaw, ‘ni lo,’ emaw ni ngawt rawh se, chûng aliam chu sual laka chhuak a ni,” a ti a (Mat 5.37), Jakoba pawhin, “Ka unaute u, eng pawh ti mah ula, chhia chham suh u; vân chhâlin emaw, lei chhâlin emaw, thil dang rêng rêng chhâlin emaw chhia chham suh u; ‘Ni’ in tih chu ‘Ni’ ni se la, ‘Ni lo’ in tih chu ‘Ni lo’ ni rawh se; chutih loh chuan, thiam loh changin in awm ang,” a tih a ni (Jakoba 5.12). Dawt lian leh dawt te a awm lo a, dawt serious deuh leh serious loh deuh pawh a awm lo. Dawt chu dawt a ni vek. Period. Dawt sawi chu sual a nih avangin, ringtute chu dawt sawi lo tura thupek dawng kan ni (Exod 20.16; Lev 19.11; Sam 119.163; Thufingte 4.24; 12.22; 13.5; 14.5; 17.7; 26.28; Zhn 8.44; Tirhkoh 5.3; Eph 4.25,29; Kol 3.9; 1 Tim 4.2; Jakoba 3.1; 1 Zhn 1.19; 2.21; Thupuan 22.15; etc). Chuvangin dawt var, dawt thiang leh dawt ṭha a awm lo.
Dawt sawi chu sual a nih chuan, chu sualna chu Pathianin a ngaidam thei ang em? Ngaidam thei e. Nimahsela, Lal Isuan thil sual titu a ngaihdam hnenah khan, “Tûn chinah chuan sual leh tawh suh ang che” tiha thu a pek ang khan (Zhn 5.14; 8.11), dawt sawi sual ata Lal Isua ngaihdamna chang tawhte chuan dawt sawi sual chu sim tawh tur a ni a, chu sualah chuan kir leh tawh lo turin fimkhur hle a tul a ni. Dawt sawi sim thei lo a, dawt kan sawi reng a nih chuan, Kristian kan nihna kan inbihchian a pawimawh hle. Kristianna leh dawt sawi chu an kal dun thei lo.
Kan society hian dawt sawi leh dawta inpuh te hi kan lak serious hle a pawimawh bawk. USA President 37-na Pu Richard M Nixon kha Watergate Case an tih, dawt sawi avanga inresign ta President a nihzia kan hria a. Pu Nixon kha Republican Party ticketa President thlan tlin a ni a, inthlan lo awm leh tur atana a inphuahchahna kal zelah Republican Party lam mi pangaten June 17, 1972 zanah Watergatea Democratic National Convention office luhchilhin documentte an ruksak thu hriat chhuah a ni ta a. A tirah chuan President chuan chu mite thiltih chu a hriatpui loh thu a sawi a, mahse a hriatpui thu fiah a ni leh si a, dawt a sawi tih a lo lang ta a ni. Chuvangin House of Representatives leh Senate-in an ban (impeach) hmain a inresign ta a ni. Dawt pakhat sawi avanga President meuh inresign kher chu a va tul lo em, titu khawvel dangah an awm nual a rinawm. Dawt sawitu politiciante leh roreltute chu an inresign vek tur a ni tih ni ta se, inresign tur roreltu khawvel ram hrang hrangah an awm teuh ngei ang. A ni, ram thenkhat leh mi thenkhatten dawt sawi an lak serious hle laiin, la serious vak loh ram leh mite an awm ve nual awm e. Kristian tamna Mizoram pawh hi dawt sawi leh dawta inpuhna la serious loh zingah kan tel ve tan niin a lang a, a pawi hle.
Thil hriat sual vanga thu sawi palhte chu a awm thin ngei mai. Rokhawlna avanga thutiam tihlawhtlin thei lohte pawh a awm ve ang. Hei hi chu dawt a ni lo. Dawt a nihzia hre si a, thu dik anga sawi leh phuahchawp thute hi dawt chu a ni. Dawta mite puh leh dawt bawka mite dawt sawiah puh pawh dawt a ni ve. Kan thusawi chu dawt a ni leh ni lo miten hre lo mahse, a hretu pahnih an awm – Pathian leh dawt sawitu keimahni. Chuvangin dawt chu thup theih a ni lo. Sawi tawh angin, dawt chu a lo lang leh thin. A lo lan hunah chuan, dawt sawitu chu miten an ring thei tawh thin lo.
Dawt chu a lan chhuah lohna turin dawt dangin khuh zel emaw, dawt bawkin sawi mam zel emaw a ngai dawn a, dawt sawi zel a ngai dawn ta a ni. Dawta chhungkua leh ram din chu a tlo lo ang. Chuvangin dawt sawi i bansan tawh ang u. Kan inchhir lo ang. Chutichuan kan mimal, chhungkua, khua leh ram leh kohhran te dawt sawi avanga sual sala tanna ata kan zalen ang a, thlamuang takin Pathian chawimawin a rawng kan bawl thei ang. Kan ram politics pawh thianghlimin a duhawm ang a, Pathian malsawm kan dawnna tur a ni bawk ang. Dawt tel lo leh dawt sawiah inpuh tawn lo politics tha neih hi thil theih a ni tih hria a, Mizoram hi dawt tel lo politics tha leh tlo tual lenna ramah i siam ang u. Kan tan a tha ang.