NHM hnuaia Programme pawimawh tak, Rastrya Bal Swasthya Karyakram (RBSK) leh Ebenezer Medical Centre-te thawhhonain naupang lung natna neite tana buatsaih Congenital Heart Disease Screening Camp tum 6-na chu Ebenezer Medical Centre, Chawnpui, Aizawlah nimin khan neih a ni.
Nimina screening camp hawnna hun hi Dr. Lalremmmawii, Directorate of Health Services-in a kaihruai a. Director Health Services chuan nausen atanga kum 18 inkar, lung na neite zawn chhuah a, a tul anga hmalakpuina hun buatsaih a ni thei chu lawmawm a tih thu sawiin RBSK programme kaltlanga naupang tam tak ten nun nuam leh hrisel zawk an neih phah ngei theih nan duhsakna a hlan a. Hemi hnu hian Dr.Vanlalsiama, Medical Director, Ebenezer Hospital chuan mite tana malsawmna thlentu ni tur leh lung natna avanga tanpuina mamawh ngawih ngawihte tana tangkaina nei thei tura RBSK Programme nen thawhhona an nei thei chu thil lawmawm leh chhinchhiah tlak tak a nih thu a sawi bawk.
Hemi hnu hian Dr. Eric Zomawia, Mission Director, National Health Mission, Mizoram chuan naupang lung natna nei ten inenkawlna tluantling an neihna atana buatsaih 6th Congenital Heart Disease Screening Camp chu hawngin thu tawi sawina hun a hmang chhunzawm a ni.
RBSK leh Ebenezer Medical Centre-te hian 25th January 2024 khan thawhhona thuthlung MoU an ziak fel a. Tichuan, he inremna bawh zui hian nimin khan Screening Camp hi buatsaih a ni ta a ni. He Screening Camp-a naupang lung enkawl ngai thlan chhuahte hi Ebenezer Medical Centre-ah enkawl an ni anga, an inenkawlna sensote hi RBSK, NHM, Mizoram chuan a tumsak dawn a ni.
Nimina Screening Camp-ah hian nau piang hlim atanga kum 18 inkar lung lama harsatna nei, veng leh khaw hrang hrang atanga naupang lo kalte nilengin en an ni a. He thu buatsaih a nih lai chawhnu dar 3 thleng khan lung lama harsatna nei naupang 186 lai Echo Screening tihsak an ni tawh a. Registration ti hi an la awm zel bawk.