Social Welfare and Tribal Affairs Dept., Govt. of Mizoram leh SELCO Foundation (SF) te chuan nimin khan Aijal Club-ah meeting an nei a, state chhunga Decentralized Renewable Energy (DRE) hmanga livelihood sector tih hmasawnna atana thawhhona tha tak an neih theih nana he hun hi buatsaih a ni.
He hun hi Lalnuntluanga Colney, State Lead, SELCO Foundation (SF)-in state chhunga eizawnna tihchangtlunna leh boruak inthlak danglamna tih ziaawmna kawnga Sustainable renewable driven approach pawimawh zia sawiin tanna hun a hmang.
Dr. Lalhriatzuali Ralte, IAS, Director, Social Welfare and Tribal Affairs chuan dept. schemes, policies leh programmes awm tawhte nena DRE solutions hmanga eizawnna tihchangtlunna kawnga hlutna belhchhah theih dan tur te a sawi a. Directorate of Social Welfare & Tribal Affairs hnuai ah rualbanlo te leh hmeichhe chanhai leh rahbi tleu te tan puanthui zirna a awm thu sawiin heng an puanthui khawl hmanga solar energy hman tura hmalak kawngah leh training centre tihchangtlun kawngah SELCO nena thawhho a beisei thu a sawi.
Dr. Hriatzuali chuan Directorate hnuaiah vek hian Tribal Research Institute (TRI), Kelsih chu hman theih tepin a awm tawh a, helai hmunah pawh hian Solar Energy an mamawh tur thu a sawi bawk. Tun sawrkar thara Hand-holding policy hnuaiah hmachhawp hrang hrang an neih thu a sawi a, chungah te chuan Phunchawng leh Rangvamual bawra ‘Mission Chhanchhuahna’ Sawrkar in bul alo tan tawh chu chhunzawma, heng ruihhlo ngaite, Jail tang chhuakte tana thiamthil pek dan tur an duan mek thu a sawi a; Smart Tribal Village- thingtlang tihchangtlun dan tur an duan mek thu a sawi bawk. Heng hmalakna hrang hrang hmachhawpah hian SELCO Foundation te nena thawhhona tha tak an neih theih a beisei thu a sawi bawk.