Zirtawp zing khan NBA play-off khelh chhunzawm a ni a, game hmasa pahniha tlawm tawh Philadelphia 76ers chuan a vawi khat nan New York Nicks an hneh. Inkhel dangah champion lai Denver Nuggets in Los Angeles Lakers an hneh nawn leh a, round sang zawk lut turin vawi khat chak chiah an mamawh tawh.
Vawi hnih tlawm zawn tawh Philadelphia 76ers hian New York Knicks lakah bul an tan tha lova, quarter hmasa pahnihah hnufual zawk an ni ve ve. Quarter hnuhnung berah pawh hnufual zawk ni mah se quarter thumnaa an chetthat an hlawkpui a, harsa takin hnehna an chang. Quarter khatna leh quarter hnihnaah hnufual zawk an nih ve ve vangin 76ers hian point thuma hmahruai chungin chawlhlawk an hmang.
Chawlhlawk hnu lamah bul an tan tha viau a, quarter thumnaah point 16 zetin an chungnung a, point 13 zetin an khingpuite an lehthal. Quarter hnuhnung berah Knicks hian an khingpui 76ers hneh let tumin tan khawh viau mah se point hnih bakin an chungnung thei lova, point 125-114 in tlawm zawkah an tang a, Philadelphia 76ers in a vawi khat nan hnehna an chang ve ta nawlh. Zirtawp zingah tlawm mah se Knicks hian series-ah 2-1 in hma an la hruai thung.
New York Knick laka an chak tum hian Joel Embiid chuan point 50 a thawkchhuak a, hei hi NBA playoff a khelh tawha point a thawhchhuah tam ber tum a ni.
Zirtawpni zinga inkhel dangah champion lai Denver Nuggets chuan an khingpui Los Angeles Lakers chu a vawi thum nan an hneh nawn leh a, series-ah 3-0 in hma an hruai chiah a, semi-final lut turin vawi khat chak chiah an mamawh tawh. Nuggets tan hian Nikola Jokic chuan point 24 a thawkchhuak a, ball sawhlet vawi 15 a dawng tling bawk. Hetihlai hian Aaron Gordon chuan point 29 a thawkchhuak ve thung. Denver lakah a zawna vawi 11 an tlawm zawn tum hian LA Lakers tan LeBron James chuan point 26 a thawkchhuak. Pathianni zingah an tlawm nawn leh a nih chuan semi-final lut zo lovin Lakers hi an tla chiang tawh ang.