Nimin, Zirtawpni khan India ram pum a Sunday School khaitu ber All India Sunday School Association (AISSA) Office Bearer-te leh Mizoram Synod hotuten Synod Office-ah inkawmhona an nei a. He hun hi AISSA President Rochamliana’n a kaihruai a, Mizoram Synod atangin Mizo Sunday School Union (MSSU) changtu Executive Secretary Rev. V. L. Luaia Hranleh leh Executive Secretary Rev. Dr. K. Lallawmzuala te an tel a, AISSA Office Bearer dangte an tel bawk a ni.
He hunah hian AISSA General Secretary Rev. Dr. T. I. James chuan AISSA chungchang leh a hnathawh dante, a hmalak tawhna leh a hmalak mekna te a sawifiah a. Mizoram Synod leh AISSA in thawhhona tha tak an neih zui zel theih dan turte zau tak leh inpawh tlang tak a sawiho a ni.
AISSA hotute hian Mizoram Synod Senior Executive Secretary Rev. C. Zorammawia chu a pisa-ah an hmu bawk a. Tin, chawhnu lamah AISSA OB-te hian NCCI hotu hlui leh AISSA President leh General Secretary lo ni tawh Rev. K. Lungmuana hovin thutkhawmna an nei zui bawk a. Vawiin, inrinni hian nilengin AISSA Office Bearer-te hi thil pawimawh hrang hrang ngaihtuahin an thukhawm zui dawn a, AISSA OB-te hi India ram hmun hrang hrangah an thukhawm thin a ni.
AISSA hotute hi Inrinni zanah Khatla Kohhran Biak Inah an inkhawm ang a, Pathianni zingah Tuikhuahtlang Kohhran Sunday School leh Mission Veng Kohhran Sunday School an tlawh ang a, chawhnuah Chanmari Kohhran Biak Inah an inkhawm ang a, zanah Zarkawt Kohhran Biak Inah an inkhawm dawn a ni.
AISSA hi India rama Kristian pawl lian berte zinga mi a ni a, National Council of Churches in India (NCCI) uapna hnuai a niin NCCI Related Agency a ni a. NCCI a tel kohhran leh Kristian pawl hrang hrangte chu AISSA ah hian member an ni a, Nagpur-a NCCI Campus-ah office an nei a, India rama Sunday School rawngbawlna chungchang a hmalakna kawng hrang hrangah tihtur leh hmachhawp tam tak an nei thin a ni.