Ningani zan khan English Premier League khelh chhunzawm a ni a, inkhel awmchhunah Manchester City chuan si li faiin Brighton & Hove Albion an sawp. City hian an chunga awm Liverpool an lehpel a, pahnihnaah awmin, hmahruaitu Arsenal nen an inkar an tizim bawk.
An elpui lian Liverpool leh Arsenal te aia an khelh tlem zawk vanga pathumnaa awm Manchester City hi Brighton hmachhawn turin American Express Stadium-ah an leng lut a, mikhual an nihna mualah an khel tha hle. Chawlhlawk hmain goal thum ngawt a thun hman a, chawlhlawk hnu lamah goal khat dang an thun belh leh bawk.
American Express Stadium a lenglut City tan hian midfielder ropui Kevin de Bruyne chuan minute 17-na lekah Walker siamsak atangin hmahruaina goal a thun. De Bruyne hian City goal hmahruai a tauh luh hmangin City tan goal 68 a thun tling chiah. Hma takah goal an thun vangin Pep Guardiola team ten inrintawkna sang zawk an nei a, mikhual an nihna hmunah phur takin an inlan chhunzawm. Thatho taka inlan an ni bawk a goal pawh an thun belh leh thuai. De Bruyne goal thun atanga minute ruk hnu lekah Phil Foden chuan an goal hnihna a thun. Season kal meka khel tha tak Foden hian minute 34-naah Bernardo Silva siamsak atangin an goal thumna a thun zui leh a, si thum faia hmahruai chungin chawlhlawk an hmang. City tana goal hnih thun Foden hian City an goal 50 a thun tling ta chiah a, City tan EPL-ah goal 50 thun tling thei 10-na chiah a ni.
Chawhlawk hma ang bawkin City hi chawlhlawk hnu lamah an khel tha chhunzawm a, goal pawh an thun belh leh thuai. Minute 62-naah Julian Alvarez chuan minute 62-naah an goal lina thunin an hmahruaina a tizau. Alvarez goal thun hnu hian hun tawp thlengin goal dang a luh belh thei tawh lova, City chuan mikhual an nihna hmunah si li faia hnehna changin point thum an hmu a, Liverpool lehpelin pahnihnaah an inhlangkai. City hian khelh 33 atangin point 76 an hmu a, point khatin hmahruaitu Arsenal an phak lo mek. City hian Arsenal aiin vawi khatin an khel tam zawk thung a, champion turin an dinhmun a tha viau rih.
City laka tlawm Brighton hi 11-naah an awm mek. Nipui bazar inhawn lai khan an player pawimawh tak Moises Caicedo leh Alexis Mac Allister te an ch^n a, chuti chung chuan table laihawl an la luah phak tho thung a. An manager De Zerbi ngei pawhin awttu a ngah viau nghe nghe.