Congress Party chuan Friday Political Session Congress Bhavan Golden Hall ah nimin khan an hmang a, he hunah hian MPCC President Lal Thanzara chuan thusawiin, MP inthlana kan campaign lai khan harsatna lian tham tawk kan awm lo a, kan pheikhai a zang hle a, Congress party te inlungrual takin Campaign a. Pathian kaihhruaina a ni tih chiang takin a lang. Result kan la hre lo a, MNF an tlin chuan ZPM rilru a na hle dawn a, ZPM an tling a nih chuan Parliament-ah NDA lamah an ṭhu ngei dawn niin a lang a, Mizo mipuite tan a hrilhai thlak hle dawn a ni, a ti.
MPCC President chuan, Congress party pawh kan beisei aiin mipuiin min thlir nasa hle a, kan tling a nih chuan kan inlungrualna vang a ni ang a, kan tling zo lo a nih pawhin MLA inthlan ai khan hma kan sawn ngei turah kan ngai. Thla 4 chhungin ZPM Sorkar hian mipuite beisei a phak lo hle a. He mi avang hian Zoram mipui tam takin Congress ah rinna an nghat leh ṭan mek a ni, a ti.
Lal Thanzara chuan, ZPM chungchang sawi chhunzawmin, tuna rorel lai ZPM hi mipuiin an duhkhawp lo hle a, keini party hi min enthla mek a, kan insiamṭhat zel a hun a, kan thawhhona a ṭhat poh leh Pathian hian mal min sawm turin a inring reng a ni, tiin a sawi. Kum 60 chhungin engmah an thawk lo tiin Modi-an Congress a puh ang chiah khan ZPM party hotupa hian Kum 40 chhungin MNF leh Congress sorkar inchhawkin engmah thawk lo angin min puh a, ZPM hotupa mizia leh BJP hotupa mizia hi a inang hlein ka hria tiin a sawi a. Remna leh muanna a awm theih nan Congress Party chuan nasa takin hma kan la a, MNF ten an tih ṭhuanawp tawh power siam chhuak turin kan bei a, MNF hluihlawn tawh referral hospital kan dinthar leh a, kuminah pawh doctor 80 bawr Mizorama thawk tur kan nei ta. Rel kawng te, helicopter services te, airport leh Tuirial HEP te pawh kan din hman a ni.
ZPM hian an term an hmang zo lo ang tia sawi a tam hle a, anni hun zawhah hian MNF an ni ang ti an awm mang lo. Kan sorkar hrawn mek hian sum ngah inti hle siin hmunphiah a lei thei lo a, thingtlang lamah sawhthing an ching nasa hle a, sawhthing hi hmunphiah anga an lei loh an hlauh thu sawi an tam hle a, kuthnathawktute an beidawng ang tih a hlauhawm hle. Congress chuan kan intiamna kan ti hlawhtling thin a ni, tiin a sawi bawk.
Lalbiakzama, MPS (Retd.), Congress MP Candidate pawhin thu sawiin, BJP te hian seat 400 chuang la tura an inbeisei kha an sawi ngam tawh lo a, Congress leh a thurualpuite an hlau êm êm ringawt mai a ni. Kan hotuten kei mi tling lo tak Candidate-a min chhawpchhuah aṭanga ka inzirchhuah chu kan dinnaah kan ding nghet a, kan tumah kan chiang a, Zoram mipuite hian CONGRESS-ah rinna an nghat leh ta hle tih ka hriat hian ka lawm hle a ni, tiin a sawi bawk.
He inkhawmah hi H. Rohluna chuan a kaihruai a, Dr. Lallianchhunga, GS, MPCC leh Vanlalruata Secretary, MPCC te hnen aṭangin report an ngaithla bawk.