#Zozam Times April 28: Tun thla ni 22-26 chhung khan Sericulture department ruahmannain MJA Serchhip District-a member 11 te chu Assam leh Meghalaya state-a Sericulture lama hmalakna te tlawhin an kal a. An lo haw ve leh Chief Minister Lalduhoma chu a pisa-ah hmu nghalin, an zinnaa an thil hmuh leh hriat te an hrilh nghal.
MJA Serchhip district-a member te hian Sericulture lama hmalakna hrang hrang – Fabric Plus, Guwahati, Chenglang, Bongaigaon; Bodoland silk park, Kokrajhar; Bhaoragwja Eri cluster leh Central Silk Board, MESSO, P3 unit Nongpoh te an tlawh a. Bodo Territorial Region, Sericulture Director Chakraborty leh Retired Director Dr Jogesh Deori ten an hmalakna hrang hrang te lo hrilhfiahin an fanpui a. Mizorama Sericulture hmasawnna turah an theihna zawna puih an inhuam thu an lo hrilh bawk.
Serchhip district MJA member te hian Muga silk pangang khawitu ten harsatna an neih thin Muga pangang tui, an duh huna awmlo thin sutkianna tura Central Silk Board-in Mizorama office thar Muga P3 unit a dah na tura mipawimawh Dr Kartig Neog. Director, MESSO. Central Silk Board, Khanapara, Assam leh Central Silk Board Scientist leh mipawimawh dang te pawh hmuin, an inkawm bawk.
Muga P3 unit kalphung te zirchiangin, Nongpoh, Meghalaya-a Muga P3 unit te an tlawh bawk a, Dr Abishek. Scientist C in staff 3 lek hmanga hneh taka unit a kalpui dan te leh farmers te tana Muga P3 unit a tangkai dan te pawh an zirchiang a. Bodo mipui nuai 10 vel zingah 42500 ten pangang khawi an hman ṭangkai dan an hmuh te chu Mizoram tan pawh hman ṭangkai theih ngei an beisei thu Serchhip district MJA member te chuan an sawi.
Mizoramah Muga silk-a hmasawnna nei turin department leh farmers lamah ruhrel (infrastructure) awm nual tawh sa hmanga reilotea farmers te hmasawnna tura ke pen theih thuai chu chakawm an tih thu CSB scientist te pawhin an lo sawi niin, Serchhip district MJA member te chuan an sawi a. Sorkar policy pakhat – hand holding policy hmanga tihhlawhtlin theih thuai an beisei thu an sawi bawk.
Serchhip district MJA member press tour-a kal te hi Sericulture Scientist Dr. Lalthlamuana Pachuau leh Sericulture Promotion Officer Lalduhsaki Ralte te bakah Serchhip Dist. MJA President C. Lalhminghlua ten an hova. Central Silk Board Gauhati atangin Bidyut Nath Choudhury Senior Scientist-in an kal kualna zawng zawngah a hruai a ni.