Inrinni liamta zing lam dar 2 bawr vela ruah leh rial thawkin Khawzawl District chhunga khaw pahnih – Tualpui leh Vankal ah te chenna in chung engemawzat a deng chhia a. Tualpui khuaah hian in 24 vel leh Vankalah in 27 vela rial hian a deng chhia nia hriat a ni.
He chhiatna thleng hi a hriat velah Khawzawl Bawrhsap K. Lalrohlua chuan chhiat tawk te chhawmdawl dan tur a ngaihtuah nghal a. Inrinni zan vek khan Tualpui khuaah Elijah LH Sanga, SDC chu tir nghalin chhiat tawkte chhawmdawl lailawk (immediate relief) atan Silpauline sem chhuah nghal a ni. Tin, nimin Pathianni tuk khan chhiat tawk te tanpui tur hian Vankal an pan leh a, chhiat tawk te hnenah Silpauline an pe leh nghal bawk. Tualpui leh Vankal khuaa chenna in chung chhia tam tak hi Village Level Disaster Management Committee kaihhruainaa thawmthat nghal a ni bawk.
Khawzawl Bawrhsap K. Lalrohlua chuan Rial tlain in chung a tih chhiat te hi verification report milin State Disaster Response Fund (SDRF) atangin tunkarah tanpuina pek nghal tum a nih thu a sawi a. Tanpuina pawisa hi Village Level Disaster Management Committee te Bank Account-ah dah luh a ni dawn a ti bawk.