Nimin zing dar 6:30 vel khan Lungsen Chhim Venga Govt Middle School-II Lungsen chu bungraw engmah chuh hman lovin a kang ral vek.
School hi a kan chhan hriat chian a ni lova, current kal sual avanga kang a nih rin a ni.
Kangmei a chhuak tih hriat a nih hian thelh theih loh khawpin a lo kang nasa tawh a, veng chhung mi tlawmngai ten an hriat veleh rang takin thleng mah se thelh mih theih a ni tawhlo. School Building leh bungraw kangral hlut zawng hi Rs. Nuai 45 vel ni a chhut a ni a, bungruate hi a kang chhe hneh hle.
Nimin khan Lungsen Educational Staff Union leh mi tlawmngai ten bungrawh dahfel hna thawkin heng hnatlangte thingpui in na hi Thorang Bialtu MLA Er.R.Rohmingliana chuan a tum sak bakah mamawhna apianga hman atan C.Lalnunnema, Vice President ZPM General Hqrs. Aizawl chuan Rs 3000 a pek bakah ZPM Thorang Block-I chuan Rs 2000 a pe bawk.
Govt Middle School-II kang hi Education Minister leh DM&R Minister hrilh hriat nghal a ni a, a hmunah DEO Lunglei leh SDEO Lungsen chuan an enfiah nghal a, school naupang ten zirna an chhunzawm dan tur an ngaihtuahpui nghal bawk.
Hemi chungchangah hian MZP Hqrs Lunglei chuan school kang chu pawi a tih thusawiin chhiatna thleng avanga kan zirlai puite’n harsatna an tawh mek chu a rang thei ang bera thuneitute’n zir chianga zirlai naupangte’n an zirna an chhunzawm leh vat theih nan hma la turin thuneitute a ngen bakah he chhiatna thleng avanga zirlai harsatna tawk mek te tan hian theihtawpin hma a lak chhunzawm zel dawn a ni an ti.