Inrinni zanah inhamtan hram tuma bei mek Le Havre hneh se champion fel mai thei tawh tur an nih laiin an mikhual team tenau Le Havre lakah Paris St-Germain chuan harsa takin 3-3 draw an hlawhchhuak thei hram a; an tum angin thil kal lo mah se an nghah rei a ngai ta lo a, Inrinni zanah anmahni hnaihbertu Monaco chu Olympique Lyonnais lakah 3-2-in an tlawm a, khelh thum chiah awm tawhah AS Monaco tan point 12-a an phak loh PSG hmakhalh ngaihna a awm tak loh avangin Luis Enrique team kutah Ligue 1 title a lut leh ta nge nge a, tunhnai kum 11 chhunga league title vawi 10 an lak tlinna a ni ta.
Tun kha Paris St-Germain tan a zawna Ligue 1 title vawithum an lakna niin, an club chanchina French champion tum 12 an nih tlinna chiah a ni.
Ti hi chuan, Enrique team hian an Champions League trophy hmasaber tur lamah rilru an sawrbing lehzual thei tawh dawn a, thla thar hian Borussia Dortmund nen semi-final game hnih an khel ang.
Pathianni zanah Monaco-in Lyon khelmual inkhel tir lamah hma hruai zet mah se rawlthar kum 19 mi Malick Fofana chuan Lyon chakna goal khungin, chu chuan an game hnuhnung vawikuaa Monaco tlawm vawikhatna a hringchhuak a, French football-a PSG chungnunna an dang zo ta lo bawk.
Tarlan tak angin, an thah fel hlawt tihah mikhual Monaco tan Wissam Ben Yedder chuan Takumi Minamino siamsak atangin goal hmahruai a thun a, mahse, minute 25 lek chhungin Lyon lamin Alexandre Lacazette leh Said Benrahma-te goal hmangin an chhanglet a, Monaco chu 2-1-in an hnufual!
Darkar khat an khel tling tihah Ben Yedder chuan Monaco siphurh sutin 2-2 ni mah se hun tawp hma minute ruk la awmah Fofana chuan Lyon chakna leh PSG champion chianna goal ni zui nghal a thun a, Paris khaw lamah champion lawmin mahni in lamah champagne an tauh hawng thei ta a, a huhoa title lawmna hun erawh a la awm lo!
PSG manager Luis Enrique chuan Monaco an tlawm tih a hriat rualin, “Kan champion ta. Kan party thei emaw thei lo emaw ka pawiti lo,” a ti.
Season liamta tawp ruala PSG-in an sengluh Spaniard hian Inrinni zanah Monaco la chak leh rih pawh ni se hlauhthawn a neih loh thu a tarlang tel.