BJP Mizoram chuan nimin khan kar thar inhlanna leh Political Session BJP State Office, Mipui Rûn, Upper Republic-ah an nei a, Lalbiakkimi, State Mahila President-in inkhawm a kaihruai a ni.
He huna thusawitu Vanlalhmuaka chuan, “Mizoram hi kan rethei hle mai a, thawhchhuah mumal tak pawh kan neih loh laiin, Central-ina Sum min pek kan ti lapse reng mai hi a mak hle a, Sorkar hian engmah tak tak an ngaihtuah loh zia tilang chiangtu a ni a, kumina sum lapse ‘₹233 crore’ hi MNF Sorkar mawhpuh chi a ni lo va, Sorkar lai ZPM mawhphurhna liau liau a ni a, he thil ah hian Sorkar kal tawh MNF mawhpuh chi a ni lova, ZPM hian he thilah hian huaisen taka an tihsual hi inpawm mai turin ka chah duh a ni,” a ti.
Hmuaka chuan, “Mizoram tana sum dah sa leh hmasâwnna hnathawhna tur sum hman lohva luangral ṭhin hi a pawi takzet a, Sum hmanlohva luang ral thin hi Sorkar hmasa ah pawh a thleng fova, hetiang thil a thlen chhan chu Sorkar inthlahdah vang leh huamhauh vang ani thin a ni. Chuvangin mahni fel lohna pawm duh lova, midang mawhpuh kan ching ṭhin hi a Kristian lo hle a ni, a ti a.
Vanlalhmuaka chuan, inthlan dawn apianga thu belhchian dawllo leh dawt thu thehdarh kan ching ṭhin te hi a Kristian lo hle a. Mizo te hian kan Kristianna hi kan nun ah kan lantir a, kan hnathawhna ah leh kan Politics khelhna ah ngei pawh, kan Kristianna kan tihlan angai a ni,” a ti bawk.