Chin National Army (CNA) leh a thurualpui CDF Tonjang, CDF Hualngoram, PDA Zomi, CDM Siyin leh CDF Mindat te chu Zomi Revolutionary Army (ZRA) – Eastern Command (ZRA-EC) nen Muallum, Chin State-ah April 30, 2024 (Thawhlehni) zan dar 11.50 vel atangin an inkap a, he chanchin ziah a nih lai thlengin an inkap a ni.
Thudawnnain a sawi dan chuan Muallum hi Tiddim Township huamchhunga awm niin, ZRA-EC thuthmun a ni a; April 24, 2024 khan CNA leh a thurualpui sipai 120 velin Tiau atangin Lentlang an pan a, hei hi ZRA-EC hian anmahni bei tura ringin Mualluma mite chu an lo inralring ve nghal a ni. April 27, 2024 khan CNA mi 20 vel, sniper leh anti-aircraft nen Lentlang panin an chhuak leh a; April 30 zanlai-ah Muallum-ah chuan silai a ri ta ngei a, an inkap ta a ni. May 1 zinglam khan Muizawl atangin CNA reinforcement-in Muallum hi a pan leh niin thudawnna chuan a sawi bawk.
“An thawhrip dan leh inbuatsaih dan enin CNA leh a thurualpuite hian ZRA-EC camp hi lak ngei an tum niin a lang a, lak a luah zui an tum ni berin a lang,” thudawnna a hming tarlan rem lo chuan a ti a; “ZRA-EC lam hi an peih chen chen kah a, nguiban thak an tum a nih hmel,” a ti bawk.
ZRA-EC hi CNA leh a thurualpuite chuan Myanmar sipai nena inremna siam a thawkho leh thuchhuah intawm siamah an puh a, hemi avang hian tum li vel zet chu ZRA-EC hi tihchhiat tumin an lo bei tawh a ni. Hetih lai hian ZRA-EC chuan, “Myanmar sipai kan kah loh avangin kan thawhpui tihna a ni lo, kan thawhhona sawi tur mumal tak nei an awm lo, an sawi pawhin phuahchawp emaw lakkawih luih a ni zel,” an ti niin anmahni hnimhnai tak pakhat chuan a sawi. “Myanmar sipai hi awlsam taka kah hneh mai chi a ni lo a, Kawlho sukthlek leh international politics awmdan enin silai nena democracy sual hi kan tih turah kan ngai lo; tunah mi heti zat Mizoram-ah raltlan a ngaih phah a nih hi. Hetiang a nih laiin Myanmar sipai kah a beih aiin an tih ang a ti ve lo beih an hmasak a, anmahni area-ah hneh phawt se, chumi hnuah midang chu an duh leh min vei se an ti thin,” a ti bawk.
Tuna inkahna thleng mek leh CNA leh a thurualpuite thawhchhuah danah, “Hmanni lawk pawh khan Chauleng-ah CNA an va lut a, an chet rawva deuh avangin a khaw mipui ZRA-EC-ah an zualko a, an inkap zui a, CNA an che chhe zawk mah a, ZRA hian CNA hliam pakhat manin an kawl a, CNA lamin Chauleng khaw-pa ulhbun nena ram kal an man bawk a. Mi man ve ve inchhuah ang an ti a, ZRA chuan Zomi Youth Association (ZYA) kutah an hlan mai a, CNA lam hian an chhuah ve lo a, chungte chu tunah hian an inhruaitirte pawh a ni mai thei,” ZRA-EC hnimhnai chuan a ti.
“Kawlpui atanga Zokhawthar-a sumdawng bungraw rawn kal hi Tiddim kaltlangin a hnai ber a, tunhma chuan CNA hian Tiddim-ah office neiin chhiah an lo la thin a, kum hnih thum liam ta khan ZRA-EC hian an rem tih tak loh avangin an awm chhunzawm thei ta lo a, hei hi CNA hian an la na hle niin a lang a, democracy movement aiin hei hi an kar thuril zawk chu a ni mai thei,” thudawnna chuan a ti. “CNA hian democracy movement chhuanlama Chin barhluih an tum niin Zomi (ZRA-EC) chuan an ngai a, chu chu an duh lo a ni,” tiin ZRA-EC hnimhnai chuan a sawi bawk.