Tunhnai kum hnih chhunga hneh taka Formula 1 thununtu Red Bull Racing in team chhunga buaina an neih chuan fel lam aiin punlun lam a pan zel niin a lang. Thuthang hrang hrang kumtir atanga an neih zut hnuah an design hotupa Adrian Newey chu a chhuak dawn.
Formula 1 chanchin a car designer ropui bera chhal Newey hi Ningani zan khan a chhuah tur thu hi a darh a. Red Bull leh amah hian chiang taka thuchhuah nei lo mahse khawtlang chanchinbu rintlak zualte pawhin Red Bull hotute hnenah chhuah a duh thu a hriattir tawh tih an sawi.
- Tunge Newey chu?
Kum 65 mi British engineer hi Red Bull Racing ah hian chief technical officer a ni mek. An car siamdan chungchanga thuneitu sang ber niin Formula 1-ah a hnuhma a hraw hle a, race engineer, aerodynamicist, designer leh technical director te ni tawhin a hnathawhna hnuaiah team hrang hrangin world title an lak tawh bakah Grand Prix vawi 200 chuangah hnehna an chang tawh.
Kum 1992 atanga 1997 chhunga Williams in F1 an thununna car siamtu zing ami a ni a. Hemi hnu hian McLaren in lalut in kum 1998 leh 1999 a F1 legend Michael Schumacher eltu Mika Hakkinen champion puitu a ni.
Kum 2006 khan team thar Red Bull Racing zawmin kum 2010 atanga 2013 inkara a zawna vawi li champion thei car siamtu a ni a. Kum 2021, 2022 leh 2023 a Max Verstappen-a world champion nihna car siamtu a ni leh bawk.
Heti taka hnuhma nei ropui leh a thiamna in fak a hlawh engineer tha hian ngaihventu a ngah. F1 team hlun Ferrari nen sawizawm an ni nghal a, British team hmachhawp sang tak intuk Aston Martin pawhin sawmna lian tak an zawrh tawh niin an sawi.
- Red Bull an buai
Formula 1 hneh takin an thunun dawn nia a lanlaiin nikum kumtawp lam atangin Red Bull Racing in ‘neuh neuh’ an nei tan. Team chhungah thuneihna inchuhna thawm a awm a, team principal Christian Horner leh Red Bull hnuaia Formula One team director Helmut Marko te inkar a tha lo niin thu a thang.
Red Bull team a shareholder lian pahnih Chalerm Yoovidhya leh Red Bull Gmbh te pawh an thu a inhmu lova. Thai sumdawng Yoovidhya hi Horner lamtang nia sawi niin Gmbh lamin Horner hi paihthlak an lo tum tawh thin.
Heng karah hian kumin kumtirah Horner hi a team thawktute lakah mawi lo takin chetna a nei nia puh a ni zui a. Hei hian Red Bull chhungkaw boruak a tih rih belh hle.
Thuthang tam tak karah Newey pawh hian chona thar hmachhawn a hun niin a inngai tiin an sawi bawk a. Heng zawng zawng karah hian Marko-a lamtang nia ngaih world champion Max Verstappen chu Horner leh Marko inkar avangin a nghet lo thei nia ngaiin Mercedes lamin an ngaihven ngawrh hle niin thu a thang bawk.
Tun dinhmunah thuthang chauh la ni hlawm mahse an world champion driver tih lova team a pawimawh bera mi tam takin an ngaih Newey a chet dawn takah chuan Red Bull hi an nghing hle dawn nia ngaihna a lian. Team insiksawina nasa tak kumin chhungin nakkum lam thlirlawkin a awm dawn niin a lang.
- Midang an inralring
Inelna thununtu team in neuh neuh an ngah takah chuan an elpuiten remchangah lak an tum. Red Bull lehpelhna huntha mai an elpuiten an hmu lova, an ralthuam tha chhuhsakna remchang a ni thei tih an hria.
An car siamtu ber Newey inchuhna boruak a lian nghal. Formula 1 chanchina team ropui ber, F1 nena inthlunzawm tlat Ferrari an ri ring nghal. Italian team hian season tharah driver ropui ber zing ami Lewis Hamilton an lalut dawn a, champion leh an tum viau.
Car tha ber siamtu neih an duh bawk a, amah Newey ngei hian Hamilton nena thawhdun a chak thu a lo sawi tawh thin. Kum 2025 kumtawp thleng Red Bull ah hian contract nei mahse an inremnaah hian kumin kumtawpa chhuah theihna tura inbiakrem theihna a awm niin an sawi.
British team Aston Martin pawhin huntha bawhpelh loh an tum hle. Newey hi contract lian tak an zawrh der tawh niin an sawi mek. Canadian billionaire Lawrence Stroll hnuaia awm Aston Martin hian F1 ah hlawhtlin ngei an tum a. Vawi hnih world champion ni tawh Fernando Alonso lalut a thawm an siam hak piah lamah Silverstone-ah team hmunpui thar tha tak an siam a, team lian zingah tel an tum ruh. Newey hian an ram chhunga hnathawh zel chu a tana duhawm a nih thu a lo sawi tel ve tawh bawk.
Driver lamah Mercedes in hmunruak an nei a, driver ropui Hamilton thlaktu tur an melh. British driver talent neitha George Russell chu an driver rinrawl ni turin theihna a nei tiin sawi thin mahse a zawna vawi thum world champion ni lai Verstappen lakluh theihna hun remchang kalsan a harsa ang.
Kum 26 mi motorsport zinkawngah Helmut Marko hi a pawimawh a, Marko hian team a chhuahsan chuan a zui ve mai tur thu a lo sawi tawh thin. Verstappen hian kum 2028 thleng Red Bull Racing a cham turin contract lian ziak thar mahse Marko a chhuah chuan chhuah ve theihna a nei tel. Heng zawng zawng karah hian Mercedes team principal Toto Wolff chuan Verstappen-a chungchang a sawi bang thei lo.
Heng boruakte avang hian kumin F1 chanchin a ngaihnawm zual dawn a, tlankawng pawn lamah intlansiakna kumdang zawng aiin a nasa zual. German car siamtu hlun Audi in kumthar atang inelna an luhchilh ve dawn a, driver tha na taka an umzui nghal avangin engkim a ti ngaihnawm zual bawk ang.