May ni 1 atanga Myanmar leh India inrina ramri khar tum a nih thu puangtu Assam Rifles in thupek an hmuhna sawi tur mumal an hre lo a, Home department-in an thil tih dan a dik lo zia hrilhin, na takin an khak.
Ramri hrula duty Assam rifles te chuan tunhnai khan ramri daido khuaa khawtlang hruaitute ko khawmin, Ministry of Home Affairs atanga thu an hmuh angin May ni 1 atangin ramri hi khar a ni dawn tih an puang a, hemi hnu lawkah ramri khar tum chu sut a nih leh thu an puang leh a ni.
Hetianga hma an lak chungchang sawipuiin Mizoram sorkara home department hotute’n April ni 29 khan Assam rifles hotute chu Aizawlah an kawm a. Hetah hian Home department hotute chuan AR hotute chu ramri khar a nih tur thu chungchanga thupek an hmuhna an zawt a, AR hotute hian MHA lehkha an dawnna phawrh tur an nei lo a, hotu sang atanga thu an hmuh thu bakin an chhang thei lo.
Home department hotute chuan thuneitu sang te atanga thu an hmuh chu state sorkar tello in bawhzui thei nghal an ni em tihte an zawt a, home department hriatpuina telloa thuthlukna siam a, hma lo la ve ngawt thei loh a nih thute na takin an hrilh a ni.
Thudawn danin, Assam Rifles te’n ramri khar a nih tur thu an puan chungchang hi Home department chuan sorkar laipuiah thlenin thil awmdan an zawt chiang a, Union Home Secretary phei chu AR hmalaknaah hian a thinrim hle nghe nghe a, ramri khar an tum chu state sorkar ngenna angin sut tir leh an ni.
Home department hotute chuan, state sorkar hriatpui loin hma la tawh lo turin an hriattir a, ruihhlo dona kawngah emaw hma an la dawn a ni pawhin an chetna tur hmun, district thuneitute emaw Police te hrilh hriat chu an tih tur a ni tih na takin an hrilh niin thudawn a ni.