Sorkar kum liamta 2023-2024 chhung khan transport department-in chhiah atangin vaibelchhe 52 chuang an hmu a, an hmu tura bi tuk hi vaibelchhe 2 chuangin an khum a, hemi kumah hian lirthei sing 3 chuang ziah luh thar a ni bawk.
Transport department hotute’n an sawi danin, financial year liam ta 2023-2024 chhunga chhiah an chhun luh tura sorkarin a bituk sak chu cheng vaibelchhe 50 (Rs. 5000,00,000) a ni a, chhiah an hmuh khawm tak chu vaibelchhe 52 nuai 38 sing 5 sang 2 leh 792 niin, an target hi vaibelchhe 2 nuai 38 sing 5 sang 2 leh 790 (Rs. 238,52,790) in an khum a ni.
Department in an chhinchhiahna atanga a lan danin, a kum telin chhiah an hmuh hi a pung chho zel a, financial year 2022-2023 chhung khan chhiah atrangin vaibelchhe 49 nuai 3 sing 4 sang 6 leh 58 (Rs 4903,46,058) an hmu a, 2023-2024-a chhiah an hmuh a punna chu vaibelchhe 3 nuai 35 sang 6 leh 734 a tling a ni.
Transport department chuan sorkar kuam liam ta chhung khan Mizoram pumah lirthei 30266 an ziak lut a, chung zinga 21204 chu two wheeler niin, hei hi lirthei ziah luh zawng zawng atangin za zela 70 a tling phak a, kum tin hian lirthei ziah luh thar zingah two wheeler hi a tam ber ziah.
Kum dang ang bawkin lirthei ziah luh zinga a tam ber dawtt chu Car a ni leh a, car 5056 ziah luh thar niin, hei hi za zela 16.70 a tling a ni.
Danin a phut angin lirthei neitute’n chhiah an pe ngei tur a nih laiin chhiah pe lo hi thahnem tak an awm thin a, transport department hotute’n an sawi danin, kum 2023-2024 chhung khan chhiah pe lo, document thi lirthei 8540 a awm a ni.