PANTOPRAZOLE BIHCHIANNA

• Dr. C. Lalrampana

A KAMKEUNA:

Pumna damdawi atana hman lar êm êm; Doctor-te chawh vang pawh ni lova miin a tha an tih vang ringawta a hlawma leia chhungkua kuaa ei thinte an awm nia sawi a awm avangin kan fimkhur tlan theih zawk nan pantoprazole hi bihchiang lawk teh ang.

ENGE A NIH?

Pantoprazole (Pantosec) hi Pumna (ulcer)/pumpui hnun lawng/thin thip/irh thur /raso leh chawpai tawih tha lo damdawi atan hman a ni a, a nihna takah chuan pumpuia thur tam lutuk lo dolettu leh vengtu damdawi tha ber pawl a ni. Mahse, he damdawi hi omeprazole angin antibiotic heng amoxicillin, clarithromycin -te nena tangkawpa ei a ngai ve lova amah lãwngin Ulcer damdawi atana hman theih a ni. Nileng zankhuaa thin thip sa vung vung leh irh thur raso luak chhuak nghulh thin tihreh nan damdawi tha tak a tling. He damdawi hi a generic chu Protonix a ni. India ramah hian Company chihrang hrangin an siam a; brand hrang awmin hming hrang hrang a ngah hle.

A HMANNA:

Tarlan tawh angin he damdawi hi irh thur, thin sa huam huam, pumpuia thur (Acid) tam lutuk tihreh nan leh ulcer hrik nei helicobacter (H. Pylori ) enkawl nan hman thin a ni.. Gastroesophageal Reflux Disease (GERD) leh irh thur pum nuam lo damdawi atana hman tangkai leh lar a ni.

A EI DAN TUR:

He damdawi hi Doctor rãwn lova ei mai mai tur a ni lo. Pum nat dan chihrang hrang a awm a, ulcer vang kher lova pumna leh na nazawngah mahnia ei ve ringawt emaw, midangte ei ve tura rinthua chawh ve ringawt chi a ni hek lo. I natnain a mamawh chiah em tih i hriat theih nan Doctor rãwn hmasain ei thin ang che.

He damdawi hi zingkar riltam kawruah lai, tukthuan ei hma darkar 1/2 la awmin tuisik thianghlim rialno 1 nen dawlh thin tur a ni a, thial sawm loh tur a ni. Tin, ni khat darkar 24 chhungin vawi 1, mum 1 bak ei loh tur a ni. Chawlhkar 2 ni 14 chhung ei tura ngaih a ni a, a tul dan azirin chawlhkar 8 thleng ei pawh a pawi lo thei. A hnu zelah erawh chuan Doctor rawn lovin mahni thua eizawm reng tur a ni lo. Mizo zingah kumpuilingleta chhungkua kuaa pantoprazole eite pawh an awm mek nia sawi a awm. Hetiang hi thil tak tak a nih chuan sim nghal vat a tha hle. Chutiang a nih loh chuan a sawhkhawk tha lo (Side effect) avangin natna dangin a bawhbuai thei che tih hriat a tha.

A NGHAWNG THA LOTE:

Allopathy damdawiho hi natna tihdam nan chakin dam rang thin hle mah se, chemical nena siam a nih avangin a natna tak atana sipai huaisen leh ral vengtu leh dotu ni mah se nghawng tha lo (Side effect) a nei veleh vek zel a, hei vang tak hian Doctor rãwn lova mahni thua ei ve mai mai hi chin loh tur a ni. Pantoprazole pawh hian nghawng tha lo a nei nual a, chungte chu hengte hi a ni tlangpui:

1. Luhai
2. Ngaigtuahna mumal lo
3. Lungphu rang leh mumal lo
4. Tihrawl phu der der
5. Helhhawlh leh phawklekna
6. Kaw khawh, ek tui leh ek thi
7. Aikhirh leh maimiziala chauhna
8. Thawpik, thawk harsa khuh leh tikhur leh tihrawl phu uih uih
9. Luna, luakchhuak, kawpuar
10. Khawsik leh khuh
11. Pum nuam lo etc.

He damdawi i ei avanga khitianga nghawng tha lo khi nangmahah a awm a nih chuan Doctor pan vat la a thurawn ang zelin awm ang che. I thu thua ngawi renga i ei chhunzawm zel chuan natna khirh khan zawk i vei zui thei tih hria ang che.

DAMDAWI DANG NENA INKHAWIHTAWN:

Pantoprazole i ei hmain Doctor hnenah eng damdawi nge ei lai i neih sawi thin ang che. A tlangpuiin heng damdawite hi i ei mek a nih pheih chuan Doctor hnenah chiang takin sawi la, inkhawihtawn pawi thei a awm avangin fimkhur hle ang che. Chungte chu:

1. Ampicillin (Pricipen, una syn)
2. Cilostazol (Pletal)
3. Clopidogrel (Plavix)
4. Cyclosporin (Gengraf, Neoral, )
5. Diazepam (Valium)
6. Phenytoin
7. HIV & AIFS medication
8. Antifungal medicine
9. Rifampin
10. Cournadin
11. Iron
12. Diuretic (Water pill)
13. Tacrolimus etc.

PANTOPRAZOLE CHI HRANG HRANGTE:

Damdawi siamtu Company-te’n Omeprazole hi brand hrang hrangin an siam a, chuvangin, dawrah duhthlan tur leh Doctor chawh ang dik tak i lei theih nan tun lai chhuak tharlam leh lar deuh hetiang hian tarlan a ni e:
Pan-40mg
Pantocid
Pantop-40mg
Pantosec
Pantodac-40
Topp-40mg
Nupenta
Necpanto-40mg
Ganatol total
Pan-20mg
Pantakind-20mg
Pan-D
Pantocid IT
PAN IV
Pantocid DSR
Pantop DSR
Pantokind DS
Dompan
Cintodac
Pansec tablet
Upan tablet
Pantium 40
P21 tablet
Protera tablet
Panido 40mg
Pantin 40mg
Pantotap
Pantazol
Pansec 40mg
Pantochek 40mg
P zole 40mg
Oakpan
Dazole 40mg
Anto 40mg
Pantomed
Duopep 40mg
Panpure
Panmint
Pazom 40mg
Athzol 40mg
Prazaqol
Gatop 40mg
Pantra P 40mgPunch 40mg etc

Heng lo pawh hi Pantoprazole+Domperidone bakah pantoprazole preparation chihrang tam tak a la awm a, tarlan sen a ni lo.

Doctor-in a chawh ang chiah zel lei tum la, a awm ngang lo a nih chuan Doctor bawk rawn leh thin rawh Pharmacist dik tak an nih loh chuan Dandawi dawr nghaktu sawi satliahah innghah loh tur tih hriat reng a tha.

INENKAWLNA CHIDANG

Allopathy piah lama alternative medicines Ayurvedic, homeopathy, herbal product, Mizo tualchhuak damdawi (Indegeneos medicines) hrang hrang nghawng tha lo nei nep zawk tam tak a awm a, chungte chu sum leh pai hautak tak sen ngai lo leh Doctor leh damdawi in pan ve theilote tan heng hi hman mai thin a tha a,, mahse, damdawi pangngai ang bawkin a hun takah pelhsawlh hauh lova ei zat zat tum la hlawkna nasa tak i chhar ngei ang.

Hengte hian nghawng tha lo a nei ve em em lova a hautak lo bawk a, dam nghal vut vut lo mah se. a dam a chiang a, a rintlak hle a ni tih hriain tangkai taka hman tum thin ang che.

1. Balhla hmin pum 1 bawnghnute tui pawlh loh no 1 nen nitin vawi 2 zingkarah leh tlai riltam laiin ei thin tur. Iron ngeih lo tan erawh chawei kham hnu minute 15-20-ah ei thin tur.
2. Yogurt rialno 1-ah drumstick hnah rawt sawm 10gm chawhpawlh in thin tur.
3. Saptheite atanga siam bawnghnute nitin zingkarah leh tlai riltam laiin rialno 1 zela in thin tur.
4. Coconut tui rialno 1/2 zelin ni 1-ah vawi 4-5 in thla 1 chhung tal in thin tur.
5. Nitin zikhlum hel tui sawr (Cabbage juice) rialno 1 zelin zingkarah leh tlai riltam laiin thla 1 chhung in thin tur.
6. Aloevera tui nitin zingkarah leh tlai riltam laiin rialno 1/2 zelin ni 40 chhung tal in thin tur.
7. Thingfanghma hnah darkar 1 chhum hnuah a tui thlifim nitin rialno 1 hmum 1/3 zelin zingkar, chhun leh tlai riltam laiin in thin a tha. A hel densawm tui pawh hman theih tho a ni a; mahse, chhum hmin hi tha zawka ngaih a ni. Thla 3 chhung tal in thin a tha.
8. Japan hlo hel hnah densawm tui thlitfim rialno 1 hmun 1/3 zelin nitin zing, chhun leh tlai riltam laiin in thin tur. Japan hlo hi chhum hmin pawhin a tha tho a, ei pawh a nuam zawk. Thla 2 chhung tal in thin a tha.
9. Mizo aieng hel densawm tui thlitfim rialno 1/2 zelah khawizu thirfiante 1 pawlhin nitin zingkarah leh tlai riltam laiin in thin tur. Chaw ei kham apianga in pawh a tha tho bawk.
10. Nitin chaw vawi 3 zing chhun leh tlaiah tlemte tea eiin chaw ei kham apiangin sawhthing hring tharlam kutzungpui tiat vel ei thin a tha. A tui in emaw a dip ei ei pawh a tha bawk. Thana leh hriatna thazam tha lo tan erawh hman loh a tha.
11. Tlangsam (Pholeng) hnah densawm tui rialno 1/2 zelin nitin vawi 3 zing, chhun leh zanriah ei hmain in thin a tha a, a chhum tui pawh a tha tho bawk.
12. Kaihzawl pil chhum tui thlitfim nitin vawi 3 rialno 1/2 zelin zing, chhun leh zan mut dawnah in thin a tha.
13. Kawlthei hmin hrisel tha nitin vawi 2 tukthuan leh zanriah ei kham apiangin pum 1 tal ei thin a tha a, a tui (guava juice) pawh in thin a tha. Kawlthei hian ril hnathawh a tanpui nghal bawk.
14. Alu hel kawr kheh loh densawm tui nitin vawi 2 zingkar leh tlai riltam laiin rialno 1/2 zela in thin tur.
15. Meihawl tui (Eucalyptus hawl) thlitfim vawi 1-ah rialno 1/2 zelin nitin zing leh tlaiah in thin tur. Meihawl tui hi vawi 1-ah in teuh emaw rei tak in a tha kher lo.
16. Fartuah pil chhum tui thlitfim rialno 1/2 zelin nitin vawi 2 zingkarah leh tlaiah in thin tur.
17. Fartuah parvar chi hnah chawhma lama lak kher chhum tui thlitfim nitin vawi 3 rialno 1 zelin zing, chhun leh zanriah ei hun hmaa in thin tur. Hei hi ril tha lo tan a tha lehzuala ngaih a ni.
18. Ailaidum densawm tui thlitfim nitin vawi 3 vawi 1-ah rialno 1/2 zelin zingkar, chhun leh zanriah ei hmaa in thin tur.
19. Zygal Syrup, Mizo Herbal Societis Keifangin a siam nitin vawi 2 chaw ei khamah rialno 1/2 zela in thin tur.
20. Liicorice zung atanga siam powder thirfiante 2-ah khawizu thirfiante 1 chawhpawhlin nitin v3 zing, chhun leh zanah thla 3 chhung tal ei tur.
21. Hnim hnah nem chikhat Slippery Elm pil den dip rialno 1/2 leh tui chhuansu rialno 1/2 pawlhin nitin v2 zing leh tlaiah khel lova ei tur.
22. Nitin purunvar mum 4-5 thial sawma eiin tui rialno 1 in zui thin tur. Hei hi thla 2 chhung tal tih thin tur.
23. Hmarchapui hmin dip Nimbu tuiah tlem phula chawhpawlh in thin tur. A tirah rialno 1/2 vela inin tihtam tial tial thin tur a ni.
24. Theihmu chikhat Bilberry rah hmin nitin ei thin a tha. Hei hian ril thali thlengin a venghim thei.
25. Pa ei chi marshmallow phoro dendip thirfiante 1 leh tui thianghlim chhuanso rialno 1 chawhpawlhin nitin zing leh tlaiah in thin tur.

A TLÃNGKAWMNA

Khing Alternative Medication-te avang khian Allopathy treatment hi hnualsuat tur tihna a ni kher lo, mimalin duh a thlang mai zawk tur a ni. Natna enkawlna chi vek an ni a, a eng zawk pawh khi hnual suat chi a ni lo. A kalkawp reng zawk tur a ni a; chutih rualin Allopathy hi mithiam bikte kut a nih avangin pawng basa ngam lutuk loh a thain fimkhur a ngai zual bik tih hriat reng erawh a pawimawh hle.