April 30, Thawhleh zan khan UEFA Champions League (UCL) semi-final first leg khelh tan a ni a. Allianz Arena-a inkhel hmuhnawm takah mualneitu Bayern Munich leh Real Madrid te chu 2-2 in an inhnehtawk. Mimualah tlawm an pumpelh vangin Real Madrid hian final luh theihna hun tha an nei.
Champion lai Manchester City hnawtchhuaktu leh UCL a club ropui ber ni bawk Real Madrid chu German club lian Bayern Munich hmachhawn turin Allianz Arena-ah an lenglut. La Liga hmahruaitu Real hian mikhual an nihna mualah ball chang tam lo mah se goal thun hmasa zawkah an tang thung. Real Madrid player pawimawh Vinicius Junior chuan Bayern defender Kim Min-jae tihsual a hrem a, inkhel tan atanga minute 24-ah si nghak Manuel Nuer dan rual lohin a pet goal a, hmahruaina goal a thun.
Team lian lakah hma taka goal an thun vangin Real Madrid an phur a, an lenluhna mualah inringtawk takin an inlan chhunzawm. Bayern hian Real Madrid lakah ball an chang tam a, hlauhawm siam zauh zauh thin mah se chawlhlawk hmain an si phurh an sut thei lo phawt.
Chawlhlawk hmain an si phurh sut thei lo mah se chawlhlawk hnu lamah erawh goal an thun ta thuai thung. Minute 53-na lekah Leroy Sane chuan Laimer siamsak atangin goal a thun a, an si phurh a sut.
An si phurh an sut hnuin Bayern Munich an khel tha chhunzawm a, goal an thun belh leh thuai. Real Madrid captain Lucas Vazquez chuan box chhungah Jamal Musiala titluin penalty a chawi. He penalty hi season kal meka goal thun thei tak Harry Kane chuan minute 57-naah chiang zetin a pet goal a, hma an hruai letna goal a thun. England captain Harry Kane-a’n penalty a pet dawn lai hian England midfielder pawimawh Jude Bellingham chuan an ram captain Kane hi tihbuai tumin a lo au. England captain laka a chet dan hian mak tih a hlawh a, sawi zui a hlawh hle nghe nghe. Bellingham-a’n chhaihbuai tum viau mah se Kane hian chiang zetin Real Madrid si nghak Andriy Lunin a bum ta tho a ni.
Mimualah hnufual zawk an nih hnuin team huaisen Real Madrid in an si phurh sut ngei tumin tan an khawh thar leh. Champions League-ah vawk lal len a, boruak sanga zam ve mai mai ngai lo Real Madrid in UCL-a an ze pangngai an chhuah a, hun tawp dawn hnaih lamah goal an thun leh ta nge nge. Hun tawp dawn hnaih Toni Kroos through ball tha tak um luttu Vinicius Junior chuan penalty a hlawhchhuak. A hlawhchhuah penalty hi Vinicius Junior hian awlsam taka pet goal in an si phurh a sut.
Vinicius Junior goal hnihna a luh hnu hian hun tawp thlengin goal dang a luh belh thei tawh lo va. 2-2 in an inthathen ta a ni.