Lai Autonomous District Council (LADC)-a MNF MDC leh Congress MDC inthurual in Sorkarna an siamtheih thu LADC Caretaker kaltlangin Mizoram Governor hnenah an thlen.
Thla hnih dawn LADC ah sorkar a kal mumal theih loh hnuah MNF MDC 12 leh Congress MDC 1 chuan United Legislature Party dinin, nimin khan sorkarna an siam theih thu hi LADC Caretaker ni mek, bawrhsap ni bawk Pu Cheemala Siva Gopal Reddy kaltlangin Governor hnenah hian an thlen a, Bawrhsap chuan an thu thlen chu Governor hnenah a lo thlen nghal tur thu a hrilh a, hemi hnu hian United Legislature Party te chuan LADC Chairman Pu VL Hmuaka hmuin Sorkarna an siamtheih thu hi an thehlut bawk.
United Legislature Party te hi Lawngtlai West MLA Pu C.Ngunlianchunga leh State Sorkar hmasaa Deputy Speaker Pu H.Biakzaua te’n tawiawmin, LADC ah Sorkar a piang mai thei lo chu ram mipuite’n an tawrh nasat vangin MNF leh Congress chuan mipui tawrhna thleng zel tur ngaingam lovin sorkar siamdun an rem ti tih an sawi.
Party pahnih inthurual Legislature Party hian an hruaitu tur thlang nghalin, Leader ah Pu C. Lalmuanthanga, Dy. Leader ah Pu Sanghuliana Mualchin, Secretary ah Pu H. Lalmuansanga leh Treasurer ah Pu Lalropuia Chinzah te an ni.
Tarlan tawh thin angin, March thla tir lam khan MNF MDC leh MDC dangte intiam rual MDC 13 te chuan khatihlaia CEM Pu V Zirsanga chuan thlawptu member a ngah tawk lo tih Governor hnenah thlenin, March ni 7 khan floor test neih tura tih a ni a, sorkar rintawk lohna motion put luh a nih hma deuhin CEM chuan banna a theh lut a, hemi hnu hian LADC ah Sorkarna siamthei an awm mailoh vangin Governor chuan LADC thuneihna laksakin enkawl lailawk turin Lawngtlai Bawrhsap chuan a ruat a, Caretaker in thla khat leh a chanve a enkawl hnu ah vawiin khan sorkar an siam theih thu hi United Legislature Party chuan an thlen ta a ni.