Sorkarin Mizoram pawna hnathawk tur thawn chhuahna tur dan thar a duan chuan an zo thawkhat tawh.
Home department hotute’n an sawi danin, Mizorama dan hman lai mek The Mizoram Private Palcement Agencies (Regulation) Act thlak na tur dan thar duan a ni a, tunah hian an zo thawkhat tawh a, he dan thar hi Mizoram pawn India ram chhung state danga hnathawk tura in thawn theihna tur a ni.
Tuna dan neihsa hnuaia trade awm chu house maid a ni rih a, dan tharah chuan trade hrang hrang thlan theih tur a awm dawn a ni.
Private placement Agency ten ram pawna hnathawk tura thalai te an thawn chhuah thinah hian thil duhawm lo thleng a awm fo a, hnathawk tura chhuak te hian an awmna tur hmun an thlenin harsatna an tawh thin a, hemi chungchang nikum lama thubuai ziah luh chungchangah Agency 30 te man an lo ni tawh.
Home department atanga thudawn danin, nikuma thubuai ziah luh tak hi Police te chhui zuiin, tunah hian thubuai hi court-a ngaihtuah theih turin chhui zawh a ni tawh.
Thubuai an chhui zawh tawh chu court-a ngaihtuah tura phalna (prosecution sunction) chu sorkar laipuia external affairs ministry emigration act hnuaiah Protector General hnen atangin dil mek a ni a, phalna hmuh a nih veleh chargesheet nghal theih a ni.