Kum 4 danah Sikserh (Malaria) laka in venna a thlawnin damdawia chiah thosi len sem thin a ni a, thosi len sem te hman that a nih kumah sikserh vei an tlem thin, tunah hian Mizoramah thosilen sem chhuah leh mek a ni.
State Vector Borne Disease Control Programme (SVBDCP) hotute’n an sawi danin, India rama sikserh vei tamna ber state-ah hian sikserh vei an tlem zel theih nan theih tawp chhuaha hmalak mek a ni a, sorkar laipui atanga a thlawna dawn thosi len te chu Mizoram hmun hrang hrangah sem chhuah mek a ni.
SVBDCP hotute chuan damdawia chiah thosi len an sem hi mipuiin an hman thar chuan sikserh a vei an tlakhniam thin thu an sawi a, kum 2016 khan thosi len sem runpui an lo neih tawh thu leh hemi kum hian a thlawna thosi len dawng tuten an zar that avangin he natna vei hi an tlem a, kum 2020-a an sem tumah erawh thosilen dawngtu zar tha si lo an tam avangin awmzia a nei vak lo tih an sawi rualin kumina an sem chhuah hi a dawng tute’n an zar that chuan Malaria vei tamna ber state ni mekah hian natna kai thar an tlem ngei an beisei tih an sawi bawk a ni.
Sikserh pu darh tu thosi hlo atana hman thin dichloro-diphenyl-trichloroethane (DDT) chu a aia tha zawkin thlak a ni dawn a, a thlakna tur hi Deltamethrin niin, June thla atangin Deltamethrin kah beihpui hi thlak a ni dawn.
SVBDCP hotute chuan DDT aia Deltamethrin an hman tawh zawkna chhan tur chu World Health Organization (WHO) in India ramah DDT hman a khap tawh vang a nih thu sawiin, thosi hlo thar an hman tur hian rawng a nei ve lo a, bang kah var a ngai tawh dawn lo tih an sawi a, he damdawi rim hi thosi in an duh lo a, a rim hnaia an awm thei lo tihte, hengte avang hian DDT ai chuan a thawk nasa zawk tih an sawi.
Tunah hian DDT thlakna tur hi chah mek a ni a, May thlaah chuan an dawn theih tawh an rin thu leh June thla atangin thosi hlo thar kah runpui hi an tran dawn tih an sawi a ni.