Chief Minister Lalduhoma’n Special Assistance to States for Capital Investment (SASCI) sum lapse awm anga sorkar puhna awm chu sawi fiahin, “Sorkar hma atanga thil lo kal, chutih laia hna an thawh danin a zir loh avanga SASCI sum a lapse a. Hei hi sorkar hmasa kha a mawhphurtu an ni,” a ti.
Zirtawpni khan CMO-ah thu thar thehdarhtute kawmin chief minister Lalduhoma chuan, SASCI sum lapse anga ZPM sorkar puh an nih chungchang chu, mi mal anga a mawhphurhna leh mipui hnena thudik hriat theihna tur atana puan a duh tih a sawi a. MNF sorkarin hna an thawh muan avang leh an chet tlai avangin hna an thawh chu zaa 75 an zawh hman loh avangin SASCI sum a lapse ta tih a sawi.
Chief Minister Lalduhoma chuan, SASCI sum Rs vbc 262.55 bang la awm chu, khatih laia chief minister in inthlanna atana MLA te hnena sem tura dah a nih thu a hrilh tih sawiin, “An che tlai a, an muang sual a, inthlan dawn hnaiah SASCI sum hi constitution wise in an sem ang a, chumi hmangin kan campaign ang tih chu ruahmanna niin CM in a puang a. Mahse, an chet tlai avangin expenditure sanction chu September 22, 2023 leh October 9, 2023-ah hmuh hman chauh a ni. An tlai tak em avangin thawk hman mang lohin model code of conduct in a lo nangching a, khatih laia hnathawh kha thawk zo lovin kan chhawm zui ta a ni,” a ti.
Sorkar hmasain SASCI sum Rs vbc 262.55 an lo insem chu tunah hian an thawk mek tih sawiin Lalduhoma chuan, “Cancel kan nei lo va, tha takin thawkin, zo hma se kan duh. Mahse, tunah hian thawh chin hi a la tlem em em a ni. Sanction tawh anih avangin stay theih ni lo mah se, tha taka thawkin zawh thuai thuai kan duh a ni,” a ti.
Tuna SASCI hnuaia hnathawh hi sorkar hmasa huna thil lo tih tawh chhunzawmna a ni tih sawiin chief minister chuan, tuna thawh mek hi zaa 75 an la achieve miau loh avangin sorkar kum thar tawp hmain second instalment dil theih a nih tak loh thu sawiin Lalduhoma chuan, “UC pawh theh luh ngaihna a awm lo va, second instalment dil thei dinhmunah sorkar hmain min siam loh avangin contract leh hna an pek a tlai avangin leh, tun thlenga thawh zawh loh anih avangin kan dil thei ta lo,” tiin, Rs vbc 233.36 chu a lapse ta tih a sawi.
SASCI sum lapse hi ZPM sorkar tih lapse-ah an puh tih sawiin, “He thil hi kan hun lai atanga thleng a ni lo va, sorkar hmasa atanga thil lo kal, chutih laia hna an thawh danin a zir loh avanfgin, second instalment hi dil thei dinhmuna ding ta lo kan nih avangin, keini chuan mawhphurhnaah kan ngai lo va, sorkar hmasa kha mawhphurtu an ni,” chief minister hian tia sawiin, SASCI sum a pumpui a sorkar hmasain, kum 2022-23 a an lo tih lapse, Rs vbc 200 nen phei chuan Rs vbc 433.36 hi sorkar hmasa hunlai khan tih lapse in a awm tihna a nih thu a sawi bawk.
Chief minister chuan kum hmasaa SASCI sum dawn zat, Rs vbc 500 dawng leh turah inngai mah se, central sorkarin SASCI sum an rawn dah tlem a, a hmaa Rs vbc 80,000 an dah thin kha, Rs vbc 55,000 chauh an dah a. Chu chu ram pumpuiin insem tur Rs vbc 25,000-a tih tlem a nih tak avangin, heta tanga Mizoramin zaa 0.5 chan tur anih avangin, Rs vbc 275 chauh a chang ta tih a sawi.
Mizoramin a chan tur SASCI sum Rs vbc 272 chu rang taka sorkarin a bawhzuiin, hemi atan hian project pariat an thlang chhuak tih sawiin chief minister chuan, “Khawi maw laia worker te insem ang kha kan ti ve lo va, Zoramin hmasawnna ruangam tha a hmuh theihna turin, kan ram mamawh zualpui nia kan hriat project pariat kan thlang chhuak a. Chu chu kumin March 15 khan central atangin pawmpuina kan dawng hman vek a. Pawmpui sa vek anih avangin MCC zawhah kan bawhzui ang a, hna hi kan thawk chhunzawm ang a, kan thawh zawh hian zaa 75 kan achieve ve leh central-ah kan dil belh dawn a ni. Kan thawh that miau chuan min pek belh kan beisei a ni,” a ti.
Chief Minister in SASCI sum Rs vbc 272 hmanga project pariat an thlan chhuah a sawite chu:
- District pariat-a jail thawm thatnan
- Augmentation of water supply and construction of 37 MLD Water Treatment Plant tihchangtlung nan
- Lunglei Water supply scheme tihchangtlung nan
- Aizawl Water Supply scheme tihchangtlun nan
- District 11-a zirtirtu quarter indaih lohna phuhruh nan
- ITI tihchangtlun nan
- Tuirial HEP evacuation line siamthat nan
- Sorkar quarter indaih lohna sak belh nan