English Premier League 2023-24 a tawp hnai a, champion tuma inum boruak erawh a nung tha hle thung. Inrinni zan khan table chung luahlu pahnih Arsenal leh Manchester City ten awlsam takin hnehna an chang ve ve a, champion tumin an inumfal zui zel.
EPL a hmahruai mektu Arsenal hian Emirates Stadium-ah table laihawla awm AFC Bournemouth an mikhual. Gunners hian an mualah an khel tha viau a, Laipui vawi thum ngawt an hmek puak a, goal chhuah an nei lo. An mualah an chakna hmang hian hma an hruai zui zel a, khelh hmabak pahnih chauh nei tawh chungin City chungah an la awm.
Arsenal hian an mual khel tha in, ball chang tam viau mah se goal erawh an thun har hle thung. Chawlhlawk hmain goal an thun thei dawn lo emaw tih hnuah an vannei a, penalty an hmu. He penalty hi season kal mekah club leh ram tana khel tha tluang tak Bukayo Saka chuan minute 45-naah a pet goal a, hmahruaina goal a thun. Saka hian season kal mekah Arsenal tan goal 20 a thun tling chiah a, Theo Wolcott hnu lamah English player Arsenal tana goal 20 thun tling leh thei hmasa ber a ni.
Chawlhlawk hmain goal thun harsat mah se chawlhlawk hnu lamah Arsenal hian goal hnih an thun belh leh thung. Hun pawimawha goal pawimawh thun thin Leandro Trossard chuan minute 70-naah goal thunin an hmahruaina a tizau a. West Ham atanga an lak fuh em em Declan Rice chuan minute 90’+7-ah an goal thumna a thun zui leh a, an mualah 3-0 a chakin, point thum an hmuh belh. He point thum hmang hian Manchester City lakah point khatin hma an hruai chhunzawm. Hmahruai zui zel mah se Arsenal hi City aiin an khel tam zawk tlat a, an tan thlamuan a har hle thung.
- Haaland a inlan e
An elpui lian ber Arsenal an chak tih an hriat hnuin Manchester City chuan Etihad Stadium-ah Wolves an mikhual. Haaland goal li thun hmangin City hian an mualah 5-1 ngawtin hnehna an chang a, Arsenal an nawr tawm chhunzawm zel.
Hliamin a tihbuai vang leh goal thun loh chang a neih tak zauh zauh vanga mi thenkhatin an sawisel Erling Braut Haaland chuan Wolves lakah goal li ngawt a thun a, goal hmangin a mah sawiseltute ka a hup. Haaland hian minute 12-naah penalty pet goal in hmahruaina goal a thun. Hmahruaina goal a thun hnu hian Rodri siamsak tha tak chu minute 35-naah fuh zetin a tauh goal. Chawlhlawk dawn hnaihah ama hlawhchhuah penalty chu Haaland hian a pet goal zui leh a, EPL-ah a vawi ruk nan hattrick a siam.
Si thum fai ngawt phur tawn Wolves hian chawlhlawk hnu lamah bul an tan tha a, Hwang Hee-chan chuan minute 53-na lekah goal thunin an si phurh a sut then. An si phurh an sut vangin lawm viau mah se an lawm rei lo. Minute 54-na lekah Haaland chuan City goal lina a thun a, an hmahruaina a tizau nawn leh. Wolves lakah goal li ngawt a thun vangin Haaland hian top scorer nih tuma inelnaah goal nga ngawtin hma a hruai fal. EPL-a goal 25 thun tling leh tawh Haaland hi EPL top scorer a nih nawn leh hmel ta hle.
Haaland-a’n goal li a thun hnu hian bench atanga lut Julian Alvarez chuan minute 85-naah City goal ngana a thun zui leh a, an mualah awlsam takin point thum an hmu zui ta a ni.
Champion lai City hi khelh 35 atanga point point 82 hmuin pahnihnaah an awm mek. An chunga awm mek Arsenal chu point khatin phak lo bawk mah se Gunners ai hian vawi khatin an khel tlem zawk a. EPL-ah a zawna vawi li champion hmasa ber ni turin an dinhmun a la tha viau tho thung.