Inrinni zan khan Spanish La Liga 2023-24 khelh chhunzawm a ni a, Girona lakah FC Barcelona an tlawm vangin hmahruai mektu Real Madrid chu champion thar an ni. Champion thar an nih hmaa an match hnuhnung berah Real Madrid hian an mikhual Cádiz chu 3-0 in an hneh.
Real Madrid champion hun tur pawt khawtlai thei ber FC Barcelona chu pathumnaa awm mek Girona mualah an lenglut. An len luhna mualah tha taka bul tanin, 2-1 a hmahruai chungin chawlhlawk hmang mah se chawlhlawk hnu lamah goal hnih ngawt an chhuah a, tlawm zawkah an tang. Municipal de Montilivi-a lenglut Barca tan hian Andreas Christensen chuan minute 3-na lekah hmahruaina goal a thun. Hma taka goal an thun vangin hlim viau mah se an hlim rei lo. An goal thun lawma an au thangkhawk ri a reh fel hmain Girona tan Artem Dovbyk chuan goal a thun zui zat a, minute lina lekah an si phurh a sut.
Hma taka goal hnih a luh hnuin goal dang a luh belh thei lo vang vang. Hun rei tak goal a luh belh theih loh hnuin Barcelona in penalty an hmu. Robert Lewandoski chuan minute 45+1-ah penalty a pet goal a, hma an hruai nawn lehna goal a thun a, 2-1 a hmahruai chungin chawlhlawk an hmang.
Chawlhlawk hnu lamah season kal mekah rin phak baka khel tha Girona an khel tha ta viau a, goal an chhuah tawh loh laiin goal thum an thun belh thung. Portu chuan minute 65-naah goal thunin an si phurh a sut. Goal an chhuah vanga an buai lai takin Girona hian na takin an mikhualte an nawr chhunzawm nghal chat a, minute 67-na lekah Miguel Gutiérrez chuan hma an hruai letna goal a thun. Hnufual zawk an nih hnuin Catalan club lian an buai chhunzawm a, goal an chhuah belh leh thuai. Minute 74-naah Portu chuan Girona goal lina a thun a, an mikhual FC Barcelona chu 4-2 in an hneh zui ta a ni.
Girona lakah Barcelona an chak loh vangin hmahruai mektu Real Madric chu La Liga champion an ni nghal. An hmelma lian ber Real Madrid an champion lai hian FC Barcelona erawh chu pahnihna atangin pathumnaah an tlahniam ve thung.
Real Madrid hian an champion chiang tawh tih an hriat hmain Cadiz an hmachhawn zui a, Santiago Bernabeu-a an mikhual Cadiz hi 3-0 in an hneh.
Real tan hian Brahim Díaz, Jude Bellingham leh Joselu ten goal khat theuh an thun. An mualah an chak hnuin Girona leh Barcelona te inkhel result an ngaichang a, an duhthusam result an hre chhunzawm. Girona lakah an hmelma lian ber FC Barcelona an tlawm vangin Real Madrid hi La Liga-ah a vawi 36-naah an champion ta a, ropui takin an champion an lawm zui. Real Madrid hi La Liga-ah vawi 36 ngawt an champion laiin an mahni hnaih bertu FC Barcelona chu vawi 27 an champion ve tawh bawk.
Champion thar Real Madrid hi season kal mekah an khel tha viau a, vawi 34 khel tawhin vawi khat chauh an la tlawm. Point 99 hmu thei dinhmunah an ding mek a. Point 99 hmu a season an khar thei a nih chuan La Liga-ah point an hmuh tam ber dawttu a ni ang.