- Lallunghnema, Charity Lodge
Chibai tha ber ka bûk a che u.
Kum 26 zet chu Consumer-te Dikna leh Chanvo buaipuiin ka lo inhmang ve ta reng mai a. Hetih hun chhung hian consumer lam thu ka ziak a, consumer lam thu chuanna bîk lehkhabu vawi 7 ka ti chhuak tawh a. Ka lawm hle zel a, ka phâk tawk a ka tih ve a ni a, tun thleng hian ka la inchhir lo a ni. Kum 1995 tir lam atang khan consumer lam hawi article ka ziakin ka sawi chho ta zel a nih hi.”Ka thianten ram an vei a,keiin mipui ka vei,”ka ti mai mai! Mi dang aiin ka vei erawh ka inti lo. Chanchinbu hrang hrangahte chuan Consumer lam thu ka ziak zel thin a,pawl hrang hrang magazine-ah ka ziak fo bawk.Local Tv Channel leh Akashvani-ahte hun ka hmang bawk thin. Tunah hian Zozam Times ah Thawhtanni apiangin column ka nei thin a, kum 5 lai a ni ta! Mahse,ka uang hauh lo a nia, U Thang! Ka lawm veng veng… hei hi thuhma hruai a nih hi..
Tichuan le, ni 22 April 2024 zing dar 7-ah Aizawl kan chhuahsan a. Keini ho hi ATI Joint Director Pu Marka hovin, driver(motor neitu) duhawm tak Pu VL leh ATI Staff fel em em Sawmtea te kan ni a. Trinity Hospital pelh lawk tawngtaina hmunah Pathian kuta inhlanna tawngtaina kan nei a.Kan tlan pur pur a,tluang takin Tuipui D kan chhun pelh hnuah Darzo leh South Vanlaiphai te paltlang zelin tlai dar 3 velah chuan Sangau khawpui chu kan lut ta a. Tourist Lodge-ah thlenna nuam tak ATI hotute hian min lo ngaihtuahsak vek a.Ka lawm hle!
A tûk Thawhlehniah chuan BDO Conference Centre-ah mi za chuang zet pungkhawm hmaah chuan Consumer Right leh Issue chi hrang hrangte chu ka sawi ta a ni. Ka sawi fo thin, ka sawi nin theih loh sawi nuam ka tih êm êm Consumer-te Dikna leh Chanvo han sawi leh thin chu nuam ka ti hle a. Vannei ka inti bawk.
He Awareness Programme-ah hian Consumer Movement lo intan chhoh dante Consumer Protection Act chungchangte, Consumer Act pawimawh ziate, ka sawi a, tute nge consumer tihte chu Consumer Protection Act 2019 tlawh chhanin ka sawi a ni.
Hetiang hian ka sawi chhunzawm zel a..Mi zawng zawng consumer kan ni. Eng angin nge consumer kan nih? Eng Dikna leh Chanvo nge kan neihte chu ka sawi uar hle a.Ka tawnhriat ka sermon hrep bawk.
India ram lian tak, mihring maktaduai tam tak chênna-ah hian mi retheite hi a tam zawk fe kan ni a. Heng mi retheite hi danin a phuar ve tho a, mahse an inhumhim ve nan dante chu an ban phâkin a awm ve si lova.Court pawh an chhawr tangkai thei ve hek lo. An dikna leh an chanvo te humhalhsak turin civil court an thleng ve thei si lova. Chu a chhapah nitin an thil leinaah lungawi lo se, an tan zualkona tur a awm lova.
Tichuan, India sawrkar chuan heng mi chuanhnuai zawkte, rethei zawkte ban phak turin the Consumer Protection Act 1986 siamin National Consumer Disputes RedressalCommission, State Consumer Disputes Redressal Commission leh District tinah Consumer Forum din a ni mek zel a. Heng Consumer Commission leh Forum-te hi Social Court tih an bawk.Mipuiin an tangkaipui mek zel ni. Khawvela Court man tlawm ber, khawvela Court chak leh rang ber(Quickest Court in the World) tih a ni hial a. Heng Consumer Commission-a comllaint-te hi ni 90 chhungin chinfel vek tur a ni nghe nghe.
Consumer Protection Act 1986 hi India President in December ni 24 -ah a hming a ziah hnan a, he mi Nî hi National Consumer Day tih a ni bawk.
Tun thlenga khawvel pumpuiin kan hman thin World Consumer Day hi March ni 15 a ni a. Kum 1962 March ni 15-ah US President J.F Kennedy chuan 4 Basic Consumer Right a puang chhuak a. Chungte chu:
1) Right to Safety
2) Right to be informed
3) Right to choose
4) Right to be heard te an ni a, heng Right te hi consumer te tan a hlu em em a ni.
Kum 30 chuang zet zawt Consumer Protection Act 1986 hman a nih hnuah Consumer Protection Act 2019 chu August ni 20-ah President-in hming a ziah hnan a. A kum leh July ni 20, 2020 -ah Consumer Protection Rules 2020 chu President-in ziakin a pawm leh ta a. Tunah hian The Consumer Protection Act chu hman chhoh a ni ta mek a, section 1.7(i) (ii) ah hian tute nge consumer tih ziakin tarlan a ni a.
Tu pawh, thil leitu leh hmangtu chu consumer an ni. Thil man, a then a zar pe then, a then ba, nakina rulh tura la te, sum pai senga thil hmangtute, mi tha hman saktute an ni. Mahse hralh leh chhawn atan thil leitute, sumdawn nana thil leitute, hmangtute erawha huam ve lo. Mahni intun nunna atan thil leitu(self employment) erawh consumer an ni, tih a ni. Tunah chuan on-line a thil tih zawng zawng a huam a, hralhtu mai ni lovin thil siamtute pawh khin theih an ni. On-line-in complaint a thehluh theih tawh a, khawi hmun atang pawhin complaint a thehluh theih tawh bawk. AAY card holder tan a thlawnin complaint a thehluh theih, fee hi court dang aiin a tlem hrim hrim. Cheng za tam tak sên a ngai lo, ukil rawih a ngai lo.
Tichuan…ka han ti leh lawk teh ang….ni 23-a hun kan hman zawh hnu in a tuk ni 24-ah Tuipang kan pan leh ta a SDO ‘C’/BDO Pi Makimi leh a nauten Circuit House-ah min lo mikhual leh a. Tuipangah hian ni 25-ah ka sawi ngai bawk Consumer Protection Act chungchang, Consumer Right leh a behbawm-te, ka tawn hriat eng emaw zat ka sawi leh ta a. Mi pawh an thahnem ka ti hle!Tui zawng sawi ka ni ngawt lo,vantlang mipui dikna leh chanvo kan inhrilh a ni.Nuam ka ti bawk a, ka hlim bawk.Hah pawh ka hre lo! Mahse, ka hlauh erawh chu kan thu hrilhte an hmang tangkai lo ang tih hi a ni.
Tu tute nge consumer-te chu… sum senga thil leitu zawng zawng, mi tha leh zung(service) hmansaktu zawng zawng te an ni. A huam zau lutuk a…A mangan thlak zawk a ni. Thu nawi sawi tul thenkhat a awm.
ATI, Mizoram hi mipui zirtirtu leh training petu institute pawimawh tak a ni.
Kan hunawlah Blue Mountain-ah kan kal a…a nuam khawp mai! Tourist hiptu tha tak a ni. Sangau leh Tuipang velah a nuam ‘bon’ tawp a. Kalkawng a tha tlang pui a, a grade a tha. Kalkawng sir a thing phun chuan zin a ti nuam hle. Mi an hawihhawm hle…Taxi vawi eng emaw zat, Sangau leh Tuipanga kan awm chhungin ka la a, Taxi pute pawh fel tak an ni. An hawihhawm hle. Khawpui zawk taxi puten an tluk lo deuh Tourist Lodge erawh chei that a ngai hle, a nghaktu tana inthlahrun awm duh ngei ang. An fel si a. Tuipanga Circuit house pawh chei that ngai a ni.
Ka hmuh dan : Phawngpui hi Tourist hîptu a ni a, enkawl uluk a ngai. ATI hotute an fel…min phurtu Bolero neitu Pu V.L. of Mission Veng aia driver tha ka la hmu lo. Sipisial Driver a ni. A zaidam a…mi kawm dan tawk a thiam…Fiamthu a ngai nâ a, fiamthu thawh a thiam bawk. Pu Mark-a hi Officer nih thiam tak a ni a…a hun leh hmun thlir chunga thusawi thiam chat chat a ni. Officer ril tak a niin ka hmu.
Heng Sangau leh Tuipang mipuite mamawh ber chu huaisenna a ni a, hriat hnua huaisenna fing fel an mamawh. Hma lam nun êng tak an nei a. Khaw thang duang tak sawrkar office establishment tha tak awmna a ni a. Consumer-te tiêngtu tur mi tha an ngah a. An fel avangin Consumer pawh an tha ang a, sumdawngho pawh rilru tha tak pu an nih chhoh ngei a beisei awm hle a ni.
Chawlhkar lehah kan titiho leh ang.
Harsatna i neih chuan pawisa sen ngai lovin min râwn thei. Centre For Consumer Education i tan a ding reng e.