Nimin khan Sports Minister Lalnghinglova Hmar chuan Indian Super League 2024 zawhfel taka champion team Mumbai City FC player pawimawh pahnih Lalengmawia Ralte leh Lallianzuala Chhangte-te lawmpuina hun a office chamber ah a buatsaih.
Sports Minister chuan, “Apuia leh Lianzuala Chhangte te hi Mizo hming timawitu an ni a, kan chhuang takzet a ni. An thawhrimna avanga hetiang dinhmun thleng chho thei hi an ni a, an nuna entawn tur pawimawh pakhat ka hriat chu an inngaitlawm em em mai hi a ni. An eichak zawng zawngte, an tih chak zawng zawngte ti lova an insum theihna avanga tun dinhmun thleng thei hi an ni a, Mizo thalaiten an nunah entawn tur kan ngah hle a ni” a ti.
Tetea Hmar chuan, “India hi khawvel huap football-ah sang lem lo mahse India team-a tel phak ringawt pawh a har takzet a, anni pahnih phei hi chu 1st Eleven chang ngei tura ngaih leh beisei an ni. Lianzuala phei hi chu a chhuanawm leh zual a, ISL-ah season khat aia tam goal 10 khung thei awmchhun niin final-ah man of the match niin Indian Super League an champion theihna tura thawhhlawk ber a ni. An hun chep tak karah lawmpuina hun kan hmang thei hi a lawmawm takzet a ni” tiin Sports Minister hian lawmpuina thingpui inpuiin thilpek a hlan bawk.
Lalengmawia Ralte leh Lallianzuala Chhangte-te hi India football team-a khel tura koh zui an ni a, Lalengmawia Ralte erawh Master degree exam hmachhawn tur a nih avangin India team a zawm ve thei dawn lo a ni.