Kum 3 vel kalta atang khan mipui tui tlan lui te chu ruahtui a tlakin a nu viau zel a, tunlaiin Aizawl mipui tui tlan chu tihthianghlim harsa khawpin a nu mek.
“Hetianga treat (tih thianghlim) harsa khawpa tui a nut hi kum 3 kal ta vel atang khan a ni a, ruahtui a tlak tan tirhin kan buai ta fo,” tiin PHE department-a Engineer-in-chief F. Liantluanga chuan a sawi.
Tunhnaia Tlawng lui a nut dan sawiin,” Thawhtanni khan a nu hle a, treat hleih theuh a ni lo a, a manganthlak khawp mai,” a ti a, PHE hotu lawkte pawh Tlawng ah hian an kal nghal a, kawng hrang hranga an beih hnuah Thawhtanni zanlai khan an duh angin tui an ti thianghlim thei hram a, an pump leh thei ta chauh a, mah se an pump tam thei lo tih a sawi.
F. Liantluanga’n a sawi danin, mipui hnena tui sem tur hi Nephelometric Turbidity unit (NTU) panga hnuai lam tur a nih laiin tunhnaia Tlawnglui tui nut zawng hi NTU 1050 bawr vel a kai hial a, hemi anih avang hian tui pump chhuak turin nasa taka tihthianghlim phawt a tul ta a ni.
Tlawnglui a nut nasat avang hian tui pump chhuah a tlak hniam phah nasa tih Engineer-in-chief chuan sawiin, nikhatah tui litre maktaduai 30 vel pump chhuah thin a nih laiin tun dinhmunah chuan tui hi maktaduai 12.2 vel chauh pump a ni a, zaa 50 dawnin tui pump chhuah a tla hniam tih a sawi a. Harsatna awm loa tluang taka tui an pump chhuah theih lai pawhin tui mamawh tu an pun avangin tui indailohna a awm sa tawh hrim hrim a, veng thenkhatah chuan thla khatah vawi hnih chauh tui sem a nih thin thute, hetianga tui pump a khaihlak nasat hnuah phei chuan tui sem hi a fan belh ngei dawn tiin, chumi avang chuan mipuite chu tui ren a, ruah tuite chu dawh khawl turin an ngen tih a sawi.
Nikum khan Mizoram hmun hrang hranga mipui tui tlan lui te chu May thla tir, ruah tui tlak tan tirh ah a nu hle a, kumin ah pawh Aizawl tui tlan chang a nu lo Tuivawl pawh tunlai hian a nu hle a, NTU 800 chuang a kai
PHE department hotupa chuan hetianga lui tui a nut na chhan ber chu leivung paih mumal loh nghawng a nih thu sawiin, mipuite pawhin bawlhhlawh paih kawngah an fimkhur chho zel a tul tak zet zet tih a sawi bawk.
Aizawl bikah PHE tui ring an pun zel laiin thawktu lam erawh an kiam zel a, kum tin thawktu pension leh thi te an awm a, hetiang karah hian tui connection nei an pung nasa thung.
PHE department hotute’n an sawi danin, Aizawl khawpui chhungah PHE tui connection la thar an pung zel a, nikum April atanga December ni 22 inkara connection an pek thar pawh 7800 chuang lai a ni a, tun dinhmuna Aizawl chhunga connection nei hi chhungkuq 79000 vel an ni.
Tui pump tu leh a sem tu, thawktu lam erawh an in daih loh hle tih PHE department hotute chuan an sawi a, hei hian tui sem chhuah hi a nghawng lo thei lo niin an sawi bawk.