Tunhnai kum 3 chhungin internet hmang khawloa dan bawhchhia mi 32 te chu court in thiam loh chantir in a hrem tawh a, kuminah Cyber Crime Police station-in mi 11 an man tawh.
Cyber Crime Police station hian 2021 atanga May ni 2024 chhungin internet hmansual kawnga pawikhawihna thubuai 276 an ziak tawh a, hemi kaihhnawihah mi 84 man ni tawh a, Cyber Crime kaihhnawih thubuaiah hian 2021-2023 chhungin mi 32 chu courtin thiam loh chantirin a lo hrem tawh a, kumin bikah covict thar an la awm lo.
Internet hmansualna thubuaiah hian sum kaihhnawiha inbumna hi a tam zual thei hle a, kumin January ni 1 atanga May ni 7 chhung thubuai an ziah luh 21 atanga 11 chu sum kaihhnawiha inbumna hi a ni a, a dawttu chu hursualna, sex kaihhnawiha inbumna niin, a bak thubuai dang chu mi nihna ruksak a, pawikhawih nana hman (Indentity theft) te, a neitu emaw a siam chhuaktu phalna la hmasa loa video theh darh copyright infringement thubuai te, hacking thubuai leh thubuai dangte a ni.
CCPS hian suma inbumna thubuai an chhuinaah hian sum hmuh let an nei fo a, kumin bikah Rs. 980,100 hmuh let a ni tawh a. 2020 atanga kumin May ni 7 thlenga sum an hmuh let zawng zawng chu Rs. 11,442,303 a tling tawh a ni.