Thawhtan zan khan English Premier League (EPL) ah inkhel pakhat a awm a, team lian Manchester United chu Crystal Palace lakah 4-0 ngawtin an tlawm a. Palace lakah hian dawl zawr takin an zawr. Palace lakah an tlawm leh tak vangin United tan European Competition khelh phak a har leh zual sauh dawn.
Selhurst Park-a lenglut Manchester United hian pasarihna luah let a, Chelsea lehpel turin chak an mamawh. Chak mamawh tak chungin inlan bawk mah se Palace an ngam lo viau a, si li fai ngawtin an tlawm. Palace laka an tlawm vang hian pariatnaah an awm chhunzawm a ngai a, pariatnaa awm hian Europa Conference league an khel phak lo chiah chiah.
Crystal Palace hian an mikhual United lakah beisei aia thain bul an tan a, goal pawh an thun thuai. Inkhel tan atanga minute 12-na lekah club lian zawkte ngaihven mek Michael Olise chuan Munoz siamsak atangin hmahruaina goal a thun. Hma takah goal an thun vangin an phur a, chawlhlawk hmain goal an thun belh leh. Minute 40-naah Jean-Philippe Mateta chuan Richard siamsak atangin an goal hnihna a thun a, si hniha hmahruai chungin chawlhlawk an hmang.
Si hnih phur tawh mah se United an insiamtha thei chuang lo va, an buai tizual turin second half-ah goal an chhuah belh leh thuai. Si hniha hmahruai tawh Palace tan hian Tyrick Mitchell chuan an goal thumna a thun belh zui leh nghal. Goal thum chhuah zawnin, an dinhmun chhe viau tawh mah se United an insiamtha thei chuang lo. Goal thun tumin tan khawh ve thin mah se beiseina thamral maiah a chang zel a, goal thun a hnekin goal an chhuah belh leh ta cheu zawk. Goal hmahruai thuntu Olise chuan minute 66-naah an goal lina a thun leh ta mai a, hei hian United hi thochhuak tur awm lek lovin a phum chiang zui ta a ni.