- Ruata
India ramah tunhnaiah Sports Utility Vehicle (SUV) leh Utility Vehicle (UV) hralh a kal hle mai a, marketah he huanga lirthei huanga lirthei hralh a pung hle a, tun tumah hian hemi huanga April thlaa lirthei hralh kal zual ho kan thlir ho dawn a ni.
Thla hmasa khan Tata Punch chu SUV huanga hralh tam ber a ni a. 19,158 lai an hralh a, nikum April thla nena khaikhinin an hralh zat punna hi zaa 75 lai a ni. Pahnihnaah Maruti Suzuki Brezza a awm thung a, Brezza hi 17,113 hralhchhuah a ni bawk a, hei pawh hi an hralh tam viau a. Nikum April thla aiin 11,836 in an hralh tam zawk a ni.
Hyundai Creta in pathumna dinhmun a hauh thung a. He midsize SUV mawi leh changkang tak hi 15,447 hralhchhuah a ni a. A dawtah hian Mahindra Scorpio awmin 14,807 an hralhchhuak thung a. Nikum April thla aia Scorpio hralh tamna hi zaa 54 lai a ni a, nikum April thla khan 9,617 an hralhchhuak a ni.
Scorpio dawtah hian Maruti Suzuki Fronx awmin pangana a ni a. Thla hmasa khan 14,286 hralhchhuah a ni a, nikum April thla khan 8,784 hralhchhuah a ni thung a, an hralh zat punna hi zaa 63 lai a ni a. Maruti Suzuki crossover thar hi a chhuahna a la rei loh ang huin an hralh hnem hle a, lirthei hlawhtling tak a tih loh theih loh a ni.
Tata Nexon, Mahindra Bolero, Hyundai Venue leh Kia Sonet te chu a indawt danin parukna, pasarihna, pariatna leh pakuana dinhmun hauhtu a ni a, an hralh zat hi a indawt danin 11,168, 9,537, 9,120, leh 7,901 te a ni bawk a ni. Heng SUV te hi chu hralh that pat SUV a tih theih a, market lamah an che chhe tak tak hleithei lo a ni.
7,756 hralhchhuah Hyundai Exter chu 10-na a ni ve leh thung a. Maruti Grand Vitara 7,651 hralhchhuah, Kia Seltos 6,734 hralhchhuah, Mahindra Thar 6,160 hralhchhuah leh Mahindra XUV700 6,134 hralhchhuah ten an dawt bawk a ni.
MPV huang hi han sawi tel leh thuak ila. Maruti Suzuki Ertiga chu he huanga hralh tam ber niin 13,544 hralhchhuah a ni a. Maruti Eeco in dawtin Toyota Innova Crysta leh Kia Carens te chu a indawt danin India rama Multi Utility Vehicle (MUV)/Multi Purpose Vehicle (MPV) hralh chhuah tam pathumna leh palina hauhtu a ni a. A indawt danin 7,103 leh 5,328 te hralhchhuah a ni.