May 7, Thawhleh zan khan UEFA Champions League (UCL) semi-final hmasa zawk khelh zawh a ni. An mualah hnehna chang tawh Borussia Dortmund chuan an lenluhna mual Parc des Princes, Paris-ah hnehna an chang nawn leh a, team lian Paris St-Germain an hnawtchhuak. Final lut zo lova an tlak tak vangin player ropui tak tak kawl khawm thin PSG in champions league-a champion an harsat chhunzawm zel a. Kylian Mbappe pawhin PSG hi a champion pui thei dawn ta lo a ni.
Signal Iduna Park-ah si khat faia tlawm tawh PSG hian German club lian Borussia Dortmund lehthal ngei tumin an mualah tan an khawh a, an khel chhe lem lo viau. An mikhual lakah hlauhawm siam fo mah se an vanduai a, a tawp an khar tha hleithei tlat lo. Chawlhlawk hmain Dortmund an him hram hram zel a, goal chhuah em lovin chawlhlawk an hmang.
Chawlhlawk hmain goal lut awm thei lo mah se, chawlhlawk hnu lamah goal a lut ta thuai. Minute 50-na lekah senior player Mats Hummels chuan Julian Brandt siamsak atangin goal pawimawh zet mai a thun. Second tirte-ah goal an thun vangin German team an phur viau a, an lenluhna mualah inrintawkna sang zawk nen an inlan zui theih phah bawk.
Second half tir teah Dortmund in goal an thun hi inkhel tihmuhnawm lehzualtu a ni a, an si phurh sut ngei tuma PSG tan khawh a hmuhnawm thei hle. French Ligue 1 champion PSG hian na takin an mikhualte an nawr a, goal pawh an thun teuh thin hle. Second half-ah hian goal bar tum li ngawt an tihper tehreng a, an vanneih ni a ni hlawl lo. An khingpui ten nawr na viau mah se Dortmund hian si belhkhawmah si hnih faiin hma an hruai vangin an chiai lova, an goal venhimn ngei tumin tan an khawh. PSG in nawr na viau mah se an him tluan thei hram a, an muala an chak tawh bakah PSG mualah 1-0 bawkin an chak nawn leh a. Si belhkhawmah2-0 a hnehna changin, UCL final an lut ta a ni.
PSG hnawtchhuaktu Borussia Dortmund hian UCL final an lo lut tawh a, hemi tuma an player pahnih Mats Hummels leh Marco Reus ten kum 11 zet hnuah Dortmund tan vek UCL final an khel leh dawn. PSG an hneh theih nan United atanga an hawh Jadon Sancho a langsarin a thawhhlawk thei hle. Dortmund-ah a khelh that thei em vangin Sancho hian hun hlimawm thar tha leh hlimawm zawk a chhar thar leh mek a. A pawimawh lohna United-ah Erik ten Hag a awm chhung chuan kir a tum tawh lo hial a ni.
French tualchhung inelna hrang hrangah hneh theih loh ang maia inlan in, champion fo mah se Champions League erawh PSG tana duan a ni lo a nih a rinawm hial. PSG hian player tha ber ber Lionel Messii, Neymar leh Kylian Mbappe te an kawl khawm lai pawhin UCL-ah thlen sang hleithei lo va, 2020-ah final an thlen kha an thlen san ber a ni rih. An player ropui ber Mbappe chuan season tawp rualin a chhuahsan ngei dawn niin a lang a. Mbappe tel lo PSG tan UCL-a champion a harsa leh zual viau tura ngaih a ni tel bawk.