#Zozam Times May 09: Kum 2023-2024 chhungin sorkar hnathawk Mizoram chhung damdawiin (Hospital)-a enkawl, an inenkawlna senso medical reimbursement (MR) bill thehlut mi 5350 an awm a, chung mite natna langsar chu thin tha lo leh zu in nasat avanga damlohna te a ni.
Mizoram State Health Care Society (MSHCS) atanga thudawn danin, MR bill theh lutte hian damdawiina an luh chhan natna an tarlang thin a, chuta tanga lang ta chu sorkar hnathawk zingah thin lam that loh avanga damdawiina inenkawl an thahnem hle a, ‘Zu ngawl vei’ tia tarlan, zu in nasa damdawiina dah luh hi an thahnem hle bawk.
Zawhna chhangin MSHCS hian an chhinchhiahna atangin natna langsar zual top 3 an tarlang a, chungte chu Thin tha lo, Zu ngawl vei leh Chaw kawng cancer te a ni. Hei hi Mizorama inenkawl bik te zinga natna langsar zual a ni.
Mizoram pawna inenkawl zingah erawh Chaw kawng cancer an thahnem ber thung a, a dawttu chu nau pai thei lo, state pawna inenkawl te an ni a, kal thlak ngai pawh natna langsar zual top 3-ah a tel bawk.
April 2023 atanga March 2024 chhunga sorkar hnathawk leh an chhungte Mizoram leh phai lama inenkawl dam lo MR bill theh lut hi mi 16111 an awm a, bill-a sum an dil zat chu Rs. 1,06, 18, 43, 779 a ni a, chuta tanga bil pek chhuah tawh chu Rs. 91,16, 40, 574 a ni.
MR bill lut zinga hian sorkar hnathawk anmahni tana bill hi mi 6,342 an awm laiin an chhungte tana bill hi mi 9,769 a tling thung.