Nimin khan Zo Re-Unification Organisation (ZORO) chuan Chief Minister Lalduhoma chu a Pisa-ah an kawm a, Chief Miriter hi India Sorkar in India leh Burma border hung (fencing) a tum chungchang leh Free Movement Regime (FMR) thiah a tum chungchang an sawipui.
Chief Minister Lalduhoma chuan ZORO hruai tute bulah, “India leh Burma ramri hung a nih loh nan leh zalen taka kan in kal pawhna dan Free Movement Regime(FMR) hlih a nih loh nan Prime Minister te, Union Home Minister te leh Sorkar laipui thuneitu hrang hrang ka lo sawipui tawh a, Mizoram area bikah Border fenc- ing ti lo tur leh zalen taka kan in kal pawhna dan Free Movement Regime(FMR) hlip lo turin ka lo ngen tawh a ni.” a ti a. Mizoram bik chu han ngaichang phawt ila, Border fencing leh FMR hi an hlip lo mai awm mange ka ti a ni, a ti bawk.
ZORO chuan India Sorkar in India leh Burma border hung (fencing) a tum leh Free Movement Regime (FMR) thiah a tum duh loh lantir nan ni 16th May 2024(Ningani) hian Zokhawthar leh Vaphai hmuna Peaceful Rally a neih tur chungchang pawh Chief Minister hi an sawipui a, Peaceful Rally neih chu CM chuan tha a ti a, kawng hrang hranga kan tan tlan a ngai a, kiltin atanga kan beih ho a ngaih thu a sawi bawk.
Tarlan tawh thin angin ZORO chuan ni 16th May 2024 hian India sorkarin India leh Burma border hung (fencing) a tum leh Free Movement Regime (FMR) thiah a tum duh loh lantir nan peaceful Rally Zokhawthar leh Vaphai hmunah a nei dawn a. He Peaceful Rally hi kan hnam tana pawimawh tak a ni a, peaceful rally a rawn tel tur hian Zoram mipuite thinlung takin kan sawm a ni.