May 12, Pathianni zan hin English Premier League-ah inkhel ngaihven hlawh tak a awm dawn a, champion tuma tan khawh Arsenal chu team lian Manchester United hmachhawn turin Old Trafford-ah an lenglut dawn. Arsenal tan United hi an khelh hmabak la awma khingpui hautak ber tura ngaih a ni a. United an hneh thei a nih chuan champion beiseina sang zawk an nei ang.
He thu buatsaih lai thleng hian Arsenal hian table-ah hma an la hruai a, khelh khata khel tam zawk chungin City aiin point khatin an sang zawk. City hian inrinni zanah Fulham an hmachhawn dawn a, City hi an chak a nih chuan Arsenal an lehpel lailawk dawn. City in an lehpel a nih chuan Arsenal hian United lakah pressure na zawk an neih phah dawn. City an chak a, Arsenal an chak lo a nih chuan City hi champion tharah puan ngam an ni hial tawh ang.
United tan Arsenal hneh hi thil chakawm a ni satliah lova, thil pawimawh a ni. Arsenal lakah an tlawm a nih chuan an tan Europa Conference League tak ngial pawh khelh phak a har tawh dawn. An muala chak mamawh United hi hliamin a tibuai nasa viau a, centre defender-ah Jony Evans chiah chhawr tur an nei. Season kal mekah Arsenal hi team lian hneh thiam an ni a. United hmaah ngei pawh hian inringtawk takin an inlan ngei tura ngaih a ni a. Inkhel hmuhnawm a ni ngei ang.