Season kal meka inelna hrang hrangah tlawm hleithei lo, vanneihthlak taka tlawm pumpelh leh mai thin Bayern Leverkusen chuan ningani zan khan mak tak maiin AS Roma lakah tlawm an pumpelh. German champion hian si belhkhawmah 4-2 a Roma hnehin final an lut a, final-ah Atalanta an hmachhawn zui leh ang.
Ningani zana Europa League semi-final thawh hnihna khelhah Bayer Leverkusen hi an mikhual AS Roma lakah an tlawm teuh hle. Si hnih an phurh reng hnuin hu tawp dawn hnaiah own-goal hmangin an si phurh an sut then a. Hun pek belh tawp dawn tepah an si phurh sut zo hramin tlawm an pumpelh. Hun tawp dawn tepa goal an thun hmangin tlawm an pumpelh ta fo va, Bayer Leverkusen hi tlawm nei lova kal tluang rei record thar siam tur renga duan an ni ngeiin a lang.
German champion thar an nih bakah treble champion nih theihna hun tha tak la nei bawk Bayer Leverkusen hian an Mimualah si hnih faia an hneh tawh Roma lakah bul an tan tha lova, an dinhmun a derthawng hman hial. Inlehthalna lian thlen tuma tan khawh Roma tan hian Leandro Paredes chuan minute 44-naah penalty atangin hmahruaina goal a thun. Hma an hruai reng hnuin Roma hian penalty an hmu nawn leh a, Paredes chuan minute 66-naah penalty pet goal nawn lehin an hmahruaina a tizau. Roma in si hnih fai ngawta hma an hruai tak vangin season kal meka a vawi khat nan Bayer Leverkusen an tlawm a rinawm hman viau.
Si belhkhawmah 2-2 a nih hnuin German champion Leverkusen in goal thun tumin taan an khawh thar a, thih tha tak meuh meuhin an mikhualte an nawr. Na taka an nawr rah an seng a, Roma player Gianluca Mancini chuan minute 82-naah an lamah a ti-goal a, German club si phurh a sut then sak. Mancini goal thun hian Xabi Alonso team a fuih phur viau a, an mualah ngei tha tho zawkin an inlan. Hun pangngai a tawp a, hun pek belh pawh a tawp hnaih tawh vangin Leverkusen hi an tlawm ngei a rinawm hman hle. Tlawm ngei tura ngaih an nih tawh laiin Josip Stanisic chuan minute 90+7-ah goal pawimawh zet thunin an si phurh a sut. Stanisic goal thun hmangin Leverkusen hian tlawm an pumpelh a, season kal mekah a vawi 49 nan tlawm nei lovin an kaltluang leh ta a ni.
Xabi Alonso enkawl Bayer Leverkusen hi season kal meka inelna hrang hrangah tlawm an la nei lova, Europe a tualchhung inelna lian zual panga zingah inelna hrang hrangah tlawm nei lova kal tluang rei ber record an siam tawh an tizau zel. Bundesliga-ah Bayern Munich rorelna titawpin an champion tawh a, Europa League final an luh bakah German Cup final an lut tawh bawk a, trophy lian pathum chawi turin final-ah vawi hnih chak chiah an mamawh tawh.
Ningani zana Europa League semi-final dangah Italian Serie A club Atalanta chuan an khingpui Marseille chu 3-0 in an hneh a, si belhkhawmah 4-1 a hnehna changin final an lut ve bawk.
Atalanta leh Marseille te hi semi-final thawhkhatnaah 1-1 in an lo inhnehtawk tawh a. Atalanta hian ningani zan khan an mualah Ademola Lookman, Matteo Ruggeri leh El Bilal Toure te goal thun hmangin hnehna lian an chang a, final an lut.
Europa League final hi May 22, Nilai zan khian Dublin Arena, Republic of Ireland-ah khelh a ni ang.