Pathiani zing khan NBA playoff semi-final khelh chhunzawm a ni a, game thumnaah Boston Celtics chuan hnehna changin Cleveland Cavaliers lakah hma an hruai nawn leh. Pathianni zinga inkhel dangah Dallas Mavericks in hnehna an chang ve bawk.
Eastern conference top seed Boston Celtics hian semi-final game khatnaah hnehna chang nghal mah se, game hnihnaah an tlawm tlat thung. Game hnihnaah an tlawm vangin game thumnaah chak tumruh zual zawkin an inlan. Pathianni zinga inkhel hmuhnawm takah point 106-93 in hnehna an chang a. Series-ah 2-1 in hma an hruai leh ta chiah.
Semi-final game thumnaah Celtics hian bul an khel tha viau a, quarter hmasa pathumah chungnung zawk an ni vek a, quarter hnuhnung berah hnufual zeuh mah se an hmahruaina an hloh phah lo. Celtics hi quarter khatnaah point hnihin an chungnung. Quarter hmasa berah khel tha lutuk lo mah se quarter hnihnaah point sarih ngawtin an chungnung a, point 9 a hmahruai chungin chawlhlawk an hmang.
Chawlhlawk hnu lamah Celtics an khel tha chhunzawm a, quarter thumnaah point rukin an chungnung zui leh. Quarter hnuhnung ber an khelh dawn meuh chuan point 15 zetin hma an hruai fal tawh a, chak turin an dinhmun a tha viau tawh. Point 15 ngawta hma an hruai tawh vangin Celtics hi quarter hnuhnung berah an inthlahdah hret a, point hnihin hnufual zawkah an tang ve. Point hnihin hnufual bawk mah se point 13 in hnehna an chang zui ta tho a ni.
Caveliers laka an chak tum hian Celtics tan Jayson Tatum chuan point 33 a thawkchhuak a, ball sawhlet vawi 13 a dawn bakah assist vawi kua a nei tling bawk. Tatum bakah hian Celtics tan Jaylen Brown a khel tha a, point 28 a thawkchhuak ve bawk.
Pathianni zinga inkhel dang Western Conference semi-final ah Dallas Mavericks chuan point 105-101 in Oklahoma City Thunder an hneh a, series-ah 2-1 in hma an hruai ve bawk. Mavericks tan hian PJ Washington chuan point 27 a thawkchhuak a, Luka Doncic chuan point 22 a thawkchhuak ve bawk. Thunder tan season kal meka khel tha tak Shai Gilgeous-Alexander chuan point 31 a thawkchhuak.