- Lallunghnema, Charity Lodge
Thil leitute leh hmangtute dikna rahbeh sak an nih thin avangin kan ramah corruption a lo hluar phah a, kan ram sum leh pai leh leilung hausaknate chu a dawngtu tur dik tak ten an dawn loh avangin retheite retheihna a zual zel a, hausate leh kut tling lova hruai tute, dikna hmai thingkawr vuah a mi bum hmangte pindan chu tih zauh sak an ni mek zel a, hengte avang bawk hian thu leh hla thiam lo ber leh hriatna nei tlem ber pawh nimah ila. Mipui thlavang hauh tur hian he consumer huang ah hian ka au chhuak lo thei lo a ni.
Tunhnai lawk khan Office pakhata ka lenna ah Ukil lar tak pakhat hian mi han en vung vung a, “ Pu Nghaka nau I ni em? A ni hi ka thianpa a ni a, High School kan kalho thin a sin” a ti a. Kei chuan a chhang li na ka nih thu ka hrilh a, ka hming min zawt ta chawt bawk a. Ka hming ka han sawi hnu chuan ralkhat atanga min lo hriat tawh thin thu leh ka thu ziakte pawh a lo chhiar thin thute, bengvarthlak a tiih thu te min hrilh a. “ Ziak zel rawh, tim reng reng suh” tiin min fuih nasa hle a. He fuihna hian min ti phur em em a ni. Ukil hian Thingpui min khilai bakah Pen min ‘present’ bawk a ni. Ka vannei phian mai
Tun tum chu ‘Khualzinte’ hi ‘Consumer’ an ni ve tho ti zawngin kan subject i han luhchilh dawn teh ang. He thu hi Pu R. Vanlalsawma leh Angel Van Sumo Service te inkhinna hian a tichiang awm e. Hei hi an thu leh hla chu a ni.
A tawi zawngin kan sawi ang. Kumin 2003 February thla khan Pu Sawma hian he Sumo kan tarlan tak ah hian Mamit Ticket a la a, mahse, seat a chang ta lova.Sumo neitute hian a ticket man an lo pek kir duhhloh avangin Pu Sawma hian Consumer Forum-ah a thlen a ni. Consumer Forum chuan ngun taka a ngaihtuah hnuin hetiang hian thu remna aa siam a ni. Hetiang hian:-
Consumer, Pu Sawma hnenah he thubuai rem atanga ni 10 chhhungin a pe ngei ngei tur a ni. Court thuremna a tipuitlinglo anih chuan a chawi tur zat atanga za a panga (5% per month) thlatin a pung tur a ni bawk. Hetiang tê tê hi a chawi dan tur chu a ni.
1) Pu Sawma ticket man (Aizawl- Mamit) Rs. 100/-
2) Aizawl a a awm chhunga senso phuhruk nan Rs. 200/-
3) Aizawla a chamchhunga a ei leh in man Rs. 150/-
4) Pu Sawma rilru a tihnat man Rs. 500/-
5) Sumo neitute hna an thawhchhiat man Rs. 300/-
6) Thubuai sawina atana Pu Sawma senso atan Rs. 750/-
A vaiin Rs. 2000/-
Hei hi Consumer Court thutlukna a ni a. Forum thu zah loh chu hei aia na zawk, Lungin tan thleng hrem, theih a ni a. Chuvangin, zin mite leh motor neitute hi kan fimkhur tlan a tul hle a. Rawng inbawlsak tawn tur kan nih hi hre reng theuh ila, tute mah hi inluling tur kan awm bik lova, dan hnuaia ei leh bar theuh kan nih hi I hre theuh ang u. Kan innghat tawn theuhva, Lâm thiamte (Dancer) pawh hi a entu mipui tel lo chuan an lam peih bik lova, insual hrattak te pawh a thlirtu mipui an awm loh chuan an insual peih bik hauh love, an tih chu!
(Note: Tuna mi hi ka lehkhabu ziak hmasa ber Consumer Enga mi ka lak chhuah a ni a, awareness atan ka awt thar leh deuh a ni e – llh.)