Nilaini zing khan NBA conference play-off semi-final khelh chhunzawm a ni a, inkhel hmuhnawm takah Denver Nuggets chuan a zawna a vawi thum nan Minesota Timberwolves an hneh a, series-ah 3-2 in hma an hruai let. Nilaini zinga inkhel dangah New York Knicks in an khingpui Indiana Pacers an hneh a, series-ah 3-2 in hma an hruai ve bawk.
NBA champion lai Denver Nuggets hian Western Conference play-off semi-final-a an khingpui Minesota Timberwolves lakah bul an tan tha lova, game hmasa pahnihah an tlawm zawn. Game hmasa pahnihah an tlawm zawn vangin an dinhmun chhe hman viau mah se an insiam tha a, game hnuhnung pathumah chak zawn vekin, series-ah 3-2 in hma an hruai let ta hial. Game thum an chak zawn vangin final an hnaih a, final lut turin vawi khat chak chiah an mamawh tawh.
Semi-final game naah Denver leh Minesota ten hmuhnawm takin bul an tan a, quarter hmasa berah an inhnehtawk nghal hle. Quarter hmasa berah hian point an inluh chhawk zak zak hnuin Denver hi point hnihin an chungnung thei hram. Quarter hnihnaah pawh an inhnehtawk zui viau a, point liin Denver an chungnung zui leh a, point ruka hmahruai chungin chawlhlawk an hmang.
Chawlhlawk hnu lamah pawh Denver Nuggets an khel tha chhunzawm a, quarter hnuhnung pahnihah chungnung zawk an ni leh ve ve. Quarter thumnaah an khel tha viau a, point riat ngawtin an chungnung. Quarter hnuhnung berah an inbei tawk viau a, point an inluh chhawk zak zak hnuin Denver hi point khatin an chungnung zui leh a, point belhkhawmah 112-97 in an chak zui ta a ni. Game ngaah an chak leh tak vangin Denver hian Series ah 3-2 in hma an hruai a. Game khelh hmabak pahnih la awmah final lut turin vawi khat chak an mamawh a. Minesota Timberwolves hian final lut turin game khelh hmabak la awm an lak vek a ngai tawh thung.
Minesota an hneh nawn leh tum hian MVP thar Nikola Jokic a khel tha viau a, point 40 a thawkchhuak a, ball sawhlet vawi 7 a dawn tlin bakah assist vawi 13 zet a nei tling bawk.
Nilai zing vek hian New York Knicks leh Indiana Pacers ten Eastern Conference semi-final game ngana an khel ve bawk. Game nganaah hian Knicks chuan point 121-91 in hnehna an chang a, series-ah 3-2 in hma an hruai ta chiah. Indiana Pacers an hneh tum hian Jalen Brunson point New York Knicks tan point 44 a thawkchhuak.