Lok Sabha MP inthlanpui neih zawh taka vote thlak pawimawhzia inzirtirna kawnga hma la tha district leh vote tlak thatna polling station te hnenah lawmman hlan a ni.
Chief Electoral Officer, Office Mizoram chuan nimin khan Aijal Club-ah result puanna inkhawm hi an buatsaih a, District-Level SVEEP and Media Competition-ah Khawzawl District chu ti tha ber an n i a, lawngtlai district chu pahnihna niin, pathumna chu Kolasib District an ni a, Lawmman pakhatna hian tangkafai cheng sing 3, pahnihna in cheng sing 2 leh pathumna in cheng sing 1 bakah an vaiin chawimawina thuziak an dawng vek a ni.
Voter Turnout Competition-ah hian vote zaa 106.41 tlakna Keifangtlang Polling Station in lawmman pakhatna dawngin, BLO chu Pu Lalhmingliana a ni a, pahnihna chu New Hruaikawn Polling Station niin, pathumna chu Sekulhkai Polling Station a ni a, heng bakah polling station vote tlak thatna dangte pawh lawmman pek an ni.
Inkhawm hi Jt. CEO Pu James Lalnunmawia’n a kaihruai a, Addl. CEO Dr. H. Lianzela chuan thu sawiin, Democracy ramah chuan mipui ta, mipui len theihna sawrkar tha tak a awm a ngai a, chumi a thlen theihna tur chuan kum bithliah chin ram hruaitu thlang thei tur ruahman a ni a, mipuite a tam thei ang berin vote an thlak theihnan theihtawp an chhuah a, hemi kawnga inelna an siam hlut sak tu te chungah lawmthu a sawi a, Inthlan felfai leh thianghlim, buaina lian tham awm lova kan neih theih avangin Inthlan nuaipuitute leh mipuite chungah lawmthu a sawi bawk a ni.