- Ruata
Tata chuan an premium hatchback changkang leh mawi tak Altroz chu a chi dang, sports verison, Altroz Racer tihchhuah an tum a, thla thar atang chuan showroom thenkhatah hmuh tur a awm tawh beisei a ni.
Premium hatchback huanga Hyundai i20, Maruti Suzuki Baleno leh adangte nena inel mek Altroz thar lo chhuak tur hi sports lam rawngkai ngaina tan chuan thil tha tak a ni dawn a. Tata Altroz hi an lirthei te lamah chuan premium huang, changkang leh kentel pawh nei tha tak a ni.
Tata Altroz Racer hi nikum Auto Expo-ah khan phochhuah a lo ni tawh a, kumin kum tir tam khan Bharat Mobility Show hmasa berah phochhuah a ni leh bawk a. Heta kan hmuh chu a styling leh rawng awm danah te danglamna kan hmu a, a ‘sporty’ viau a ni. I20 te hian N Line an nei a, hei pawh hi Hyundai lamah chuan an sports version a ni a, heng te nen pawh hian a inel thei tura ngaih a ni.
A khawl lamah chuan Tata Altroz Racer, 1.2L, 3-cylinder turbocharged petrol engine, Nexon-ah te pawh kan hmuh ang a hmang dawn a. He khawl hian 120bhp power leh 170Nm torque a pechhuak thei a, Altroz iTurbo aiin bhp 10 velin a power a sang dawn a, a torque pawh Nm 30 velin a sang zawk dawn bawk a, a chak tha dawn viau a. 6 speed manual gearbox a rawn neih beisei a ni bawk.
A rawng lamah chuan rawng chi hnih inpawlh, dual tone a ni ang a. A bonnet leh a chung chu racing strip pahnih hmanga chei a ni ang a, a hma grille hi a pangngai aiin tlemin a danglam bawk ang. A hma fender-ah ‘Racer’ badge a chuang vang ang a, alloy wheel design thar a nei dawn bawk a ni.
Sports theme hi a chhunglamah pawh kan hmu dawn a. Rawng lar deuha a seat thuina te, sports version lirthei danga kan hmuh ang kan hmu ang a. A kentel hrang hrang zingah 10.25-inch touchscreen infotainment system, HUD unit, 360 degree camera, voice assisted sunroof te bakah himna lamah airbag paruk (6) leh electronic stability control te a tel dawn a ni.
A man tur leh book theih hun chu company lam atangin thu thar la ngaihchan zel a ngaih hmel a, hetihrual hian a man tur hi Rs nuai 10-12 inkar beisei a ni a. Tuna a chanchin kan han tarlan aia dik leh kimchang zawkin company lam atang te pawhin kan la hre thuai ang a, eng pawh ni se ngaihchan phawt rih a ngai dawn a. Premium hatchback changkang leh mawi, ‘sports’ version lo chhuak tur hi a nghahhlelhawm hle a ni.