Pawl 10 result tih chhuah taka distinction-a pass, subject palia letter hmu Vohbik naupang Dominic Vanlalpekhlua chu Social Welafare minister Lalrinpuii’n laptop a hlan.
Thil pek inhlanna inkhawm tawi hi nimin khan minister pisaah neih a ni a, Rinpuii chuan pianphunga rualbanlote chu sorkarin a ngaipawimawhin, a ngaihsak hle tih a sawi a, Dominic-a hlawhtlinna chu ropui an tih thu leh an ngaihhlut hle thu a sawi a, taksa lama harsatna nei chunga a zirlaiah tha tak maia a pass a, subject pali lai maia letter a hmu hial mai chu midangte tan pawh entawn tlak hle nia a hriat thu a sawi.
Inkhawm tawi neihah hian State Commissioner for Persons with Disabilities Vanlaldiki Sailo pawhin thu sawiin, sorkarin rualbanlo te a ngaihsak a, sorkar hna lakah pawh an quota dah zel tura tih a nih thu leh Mizoramah pawh he quota hmanga sorkar hnaa lut an awm nual tawh thu a sawi a, rualbanlote chu an sikul kalnaah te leh puipunna hmunahte an tana chet awlsam theihna tur remchang siamsak zel tura tih a nih thute a sawi.
Social Welfare minister in lawmpuina thuziak leh laptop a hlan tak Dominic Vanlalpekhlua (15) hi , Sihphir Kawn Venga khawsa a ni a, taksa lama harsatna tawkin wheelchair hmang loa che sawn thei lo a ni a, Sihphir Presbyterian English School ah lutin, HSLC result tih chhuah takah khan distinction-ah pass in, subject pali – English, Match, Science leh Mizo ah te letter a hmu a ni.