Ningani zing khan NBA conference play-off semi-final khelh chhunzawm a ni a, Cleveland Cavaliers laka chak nawn leh Boston Celtics in Eastern Conference final an lut. Ningani zinga inkhel dangah Dallas Mavericks in hnehna an chang a, final an hnaih ve bawk.
Series ah 3-1 a hmahruai mek Boston Celtics hian final luh chian nghal ngei tumin Cleveland Cavaliers an hmachhawn a. Cavaliers hian final luh beisei chhunzawm turin chak ngei an tum a, game nganaah inhnehtawk takin bul an tan. Game ngana quarter hmasa berah Celtics leh Cavaliers hian point 28 ve ve an thawkchhuak a, chungnung zawk an awm thei lo phawt. Quarter khatnaah inhnehtawk viau mah se quarter hnihnaah Celtics an khel tha a, point rukin an chung a, point ruka hmahruai chungin chawlhlawk an hmang.
Chawlhlawk hnu lamah Celtics an khel tha chhunzawm viau a, an hawikir tawh lo. Quarter thumnaah point khatin an chungnung hram a, quarter hnuhnung berah point hnihin an chungnung leh bawk. An khingpui Cavaliers lakah hian point 113-98 in hnehna an chang a, final an lut ta a ni. Boston Celtics hian conference final an lut thei riau a, season hnuhnung vawi riatah tun hi final an luh vawi rukna a ni a. Season thum chhung a zawnin final an lut ta chiah bawk.Final-ah hian Indiana Pacers leh New York Knicks te inkhela chak zawk zawk an hmachhawn ang.
Ningani zinga inkhel dangah Dallas Mavericks chuan an khingpui Oklahoma City Thunders chu 104-92 in an hneh a, series-ah 3-2 a hmahruaiin final an hnaih. Thunders laka an chak tum hian Mavericks player pawimawh Luka Doncic chuan point 31 a thawkchhuak a, ball sawhlet vawi 10 a dawn tlin bakah assist vawi 11 a nei bawk a. Semi-final game hnuhnung pahnihah treble-double a puitlin zawn.