- Ruata
Mahindra chuan an SUV lian leh changkang XUV700 huangah variant thar, AX5 Select (AX5 S) an tlangzarh thar.
- Mahindra XUV700 AX5 S
Mahindra XUV 700 AX5 S hi XUV700 bikah man to dan leh a variant indawt danah chuan a laihawl bawra awm tur a ni a. Petrol leh diesel hmang duhthlan tur a awm a. Rs. Nuai 16.89-17.49 (ex-showroom) man inkar a ni.
He SUV variant tharah hian a khawl lamah chuan a ngai, variant dangah pawh kan lo hmuh tawh ang, 2.0 litre turbo petrol khawl, 197bhp power leh 380Nm torque pechhuak thei kan hmu a. Diesel hmang ve thungah chuan 2.2 litre diesel khawl duhthlan tur pahnih, 153bhp power leh 360Nm torque pechhuak thei leh 182bhp power leh 450Nm torque pechhuak thei te a awm thung a ni. Transmission lamah chuan manual leh automatic duhthlan tur a awm bawk.
A kentel lamah chuan Mahindra XUV700 AX5 Select hian dual 10.25-inch screen (pakhat infotainment atan leh a dang pakhat instrument cluster atan), wireless Apple CarPlay & Android Auto, AdrenoX Connect, Amazon Alexa, skyroof, cruise control, drive mode hrang hrang, engine start/stop button, follow-me-home headlamp with LED DRL, cornering lamp, full-sized wheel cover, leh LED taillight te kan hmu a ni.
- Mahindra chanchinthar dang
Mahindra & Mahindra hian kum 2030-ah chuan SUV thar 16 an tichhuak hman tawh dawn tih an nemnghet a. Hetah hian ICE (internal combustion engine) model pakua, EVs (electric vehicles) pasarihg, tuna chhuak mek hmelthar nena tihchhuah thar leh tur (XUV 3XO telin) pathum bakah lirthei thar hlak dangte a tel a ni. Mahindra electric SUV thar lo chhuak tur te hi INGLO architecture nghahchhana duan tur a ni hlawm a ni.
- Mahindra XUV700 electric version tur XUV.e8
Heng lirthei thar tur ho zingah hian Mahindra XUV.e8 pawh a tel a, hei hi XUV700 SUV electric version a ni dawn a. Kumin December thlaah hian khawvel pum huapin an phochhuah hman beisei a ni a. Lei theih tura tlangzarh fel erawh nakum kumtir lam a nih hmel thung a ni. He electric SUV thar tur hi tlangzarh a nih chuan Tata Harrier EV nen an inel thei dawn a, hei hi kumin chawhnu lam deuhah tlangzarh tura beisei a ni. A elecric khawl lamah chuan 80kWh battery pack a nei ang a, single front-axle mounted electric motor a ni dawn a. Vawikhat charge full in km 500 lai tlan thei tura ruahman a ni a. A dung mm 4,740 leh a ke hnung leh hma innghahna lai inhlat zawng mm 2,762 a ni dawn a ni. Mahindra SUV thar ho angin kentel hrang hrang changkang leh tunlai ber bera thawm tura beisei a ni bawk.
Mahindra hian technology leh design lamah an SUV hoah tunhnaiah nasa takin hma an la a, hma pawh an sawn reng bawk a. India chhulchhuak lirthei company hlun leh tha Mahindra atangin lirthei changkang leh tha tak tak kan hmuh belh chho zel dawn niin a lang a, a nghahhlelhawm chho viau a ni.