- Mahmuaka Chhakchhuak
CoviD hripui rapthlak tak chuan min kiansan ta. Khatiang taka rapthlak leh nunna suat tur khan kan hnenah a rawn thleng leh ang ngem tih erawh hriat phak a ni kher lo a. A ngaihawm loh a, lung a tileng lo a, hriatreng tlak lah a ni hek lo. Nimahsela chuti ngawt chuan kan theihnghilh thei bawk chuang si lo a, duh loin ngaina lo hle mah ila kan hre reng dawn a, kan theihnghilh tawh ngai lo ang. Kum sawmbi hnih emaw chu aia tam emaw pawh hun a rawn inher chhuah leh hunah phei chuan chanchin ngaihnawm tak pawh ala nih ngei a rinawm a, kan hnamin a tawrh dante leh kan chunga harsatna chi hrang hrang a thlen dante chu lehkhabu chhah tak takin an la rawn ziak ang a, chutih rual chuan a tha lama kan rama thil a rawn thlen tir dan pawh thui tak tak ziah tur a awm bawk ngei ang. A sulhnu tam tak erawh chuan tun hun atang ngei pawh hian min chenchilh reng rih dawn a nih hmel a, a chhe lama min hnutchhiah tam tak hi sawi tur a awm nain a tha lama min hnutchhiah lam han sawi hmasa ta zawk ila.
THAWHRIMNA LEH TAIHMAKNA: Khati taka CoviD hripuiin min chim a, kan nunphung min tihbuai nasat tak chiam avang chuan kan eizawnna ngei pawhin harsatna a tawk lo thei lo a. Hun rei tak chhung inkharkhipin kan awm a, kha inkharkhip chhungah khan damlohna avanga pawn chhuak thei lo mi engemawzat chu lo awm bawk mahsela dam reng chunga pawn chhuak lo kha a tam zawk kan ni a. Chutianga dam renga han inkhung chu thenkhatte tan chuan thatchhiat pawh a awl viau theih laiin thenkhatte chuan thil tam tak, a bik takin thil tha ngaihtuah chhuahna atan an lo hmang bawk a, a lawmawm hle.
Inkharkhip chhung khan mi engzat takin nge You tube channel siam thar awm kha hriat har tak tur a ni a, mi engzat chiahin nge lehkhabu chhuah thar tih pawh chhiar thil thlep har tak tur a ni mai thei e. Mahni in kianga thlai ching uar ta lah kan tam narawh e. Hriselna kawngah ngei pawh mitin kan inenkawl uluk zual bawk a, hmaituam kan ching thar kha vawiin thlengin kan la bansan chuang lo a, kan la chhunzawm reng hi thil tha takah chhiar tel ngei tur a ni ang. Tin, CoviD hripui leng avanga harsatna kan tawh lai khan mi thenkhatte chuan hun hi an lo hmang tangkai hle mai a, hun hlutna pawh an hre lehzual bawkin a hriat a. Hun inzat theuh kan neih laiin Concrete building chhawng tam tak lo sak thei phah ta pawh an awm.
Sum leh paiah harsatna nasa tak CoviD vang khan kan tawk a, nitin mi hnuaia inhlawhna a tlem phahin ram hnathawkte tan ngei pawh hna thawh a harsa a nih kha. Kamding leh dawrkai tan ngei pawh mumal taka hun hman a theih loh avangin kan neihsa kan ei zo thuai a, a thente phei chuan kan bungraw hlu tak tak kan hralh phah hial bawk a. Chutiang taka retheihna khura kan luh takah chuan sum leh pai lakluh theihna tur kawng awm thei ang ang kan dap a, kawng a awm loh pawhin thenkhatte chuan kawng an sial chawp bawk a. In hmun commission pawh khawpui lamah chuan a lar hle a, Office lama file bawhzui tura hlawhfa rawihte pawh sawi tur a awm. Ketin leh kuttin chei ringawt pawh sum hmuhna tha taka hmang kan lo awm zel bawkin Hair cutting delivery pawh chhiar tham an awm bawk. Lungleia Zuala phei hi chuan a nghetin hair cutting delivery hi zathum vel lai a nei a, zathum vel chu za-a puntir chuan tam tak a ni.
MIDANG INA LENG MAI MAI KAN TLEM: CoviD hrileng avang khan mi kan intlawhpawh lo ta hle mai kha kan fimkhur vang a ni ber. Nimahsela hripui leng a reh hnuah ngei pawh mi kan inlenpawh lo chhunzawm ta deuh zel hi CoviD malsawmna a tih loh theih loh. Thil tul leh pawimawhah chuan lohtheih loha midang ina len leh tlawh a ngai a, chu erawh bansan theih a ni kher lo. Chutih rual chuan thil pawimawh leh tul pawh ni lem chuang loa midang ina len mai mai ching hi kan tlem ta hle mai a, a lawmawm.
Mi ina len hian min lo dawngsawng lo thei lo a, nimahsela keini min lo dawngsawng tur chuan thil pawimawh engnge an kalsan a, an chawlhsan tih erawh kan ngaihtuah kher lo thei. Sawi tawh angin mitin hian thil pawimawh leh tul khawih a, buaipui kan ni hlawm vek a, lehkha ziakmite phei chuan hunthawl an mamawh lehzual. Chutianga mi buai laia kan lo va tihbuai emaw kan lo va tihkhaihlak hian an tan harsatna tam tak a thlen phah theih avangin midang ina len mai mai hi thil uar chi tak a ni lo mai thei e. Hri leng vanga kan uar tak loh deuh hlek leh a hnu leh lam zel pawha kan chhunzawm loh tak zel hi thil tha tak niin a hriat a, thenawm khawveng leh khawtlang inngainatna ngei pawh a chuai phah kherin a rinawm loh.
Mihringte hi a huhoa cheng thin kan niin midang telloa nung thei lo kan ni bawk a, tumah hi mahnia awm a, midang mamawh lo hi kan awm lo. Nimahsela hripuiin min han chenchilh tak tak chinah kha chuan kan inmamawhna kan titlem sawt a, mahnia awm theih kan tumin midang mamawh lo thei ang bera nun hman tum tam tak kan lo awm phah ta hi thil lawmawm tak a ni. Inbiakpawhna alo awlsamin mahni awmhmunah tupawh kan inbe pawp zung zung theih bawk avang hian hnathawh pawh kan awlsamin lohtheihlohah lo chuan hmaichhana inbiak kan tum ta lo bawk hi CoviD malsawmna a tihlohtheih loh. Chutiang chuan hun a heh loh zawk a, tangkai taka hun a hman theih tak avangin thenkhatte tan chuan CoviD hripui leng kha malsawmna nasa tak alo nih phah kan ti thei bawk ang.