BJP Mizoram State chuan nimin khan an party office ah political session neiin, Lalrintluanga Hnamte, State Kisan Morcha President-in inkhawm a kaihruai a, Johny Lalthanpuia, State Media Convener-in State IT & Media Department hmalakna hrang hrang report pein, Lalramtiama, State Core Group Member & Vanlalhmuaka, State President te’n thusawina hun an nei bawk.
Vanlalhmuaka BJP Mizoram State President chuan, “Party ṭhenkhat Party dang Manifesto ruk saka, mahni tih ang maia kalpui thin an awm a, BJP erawh Party dang Manifesto a rûksak ve ngai lo,” a ti.
Hmuaka chuan, “Party dang te’n Hindu Party min ti fo mai, nimahsela vawiin thleng hian BJP President tawh te leh hruaitute hian chal kan hnawihsen ve ngai lova, Coconut kan sawh keh ngai hek lo. Zoram mipui te hma a Hindu Party-a min puhtu Mizoram Congress Party hotupa erawh chuan chal a hnawihsen a, Coconut hial sawhkehin Durga Hindu pathiannu hmaah Hindu serh leh sang a khawih a ni. Chuvangin min beitute hian Mizoram hi an hmangaih lo hle a, Politics hi eizawn nan an hmang mai a ni tih a ti chiang a, Sakhuana ah phei chuan Kristianna hi an pawngsual reng zawk a ni,” a ti.
Hmuaka chuan Mizorama sawrkar tawhte chungchang sawiin, “Kan Sorkar hrawn tawh te kal hmang en hian ‘Time Pass’ nana Sorkarna siam mai mai hi an ang ṭhin hle a, Manifesto nei ṭha hle mahse tih hlawhtlin theih loh avanga chhuanlam tur zawng reng ṭhin Sorkar kan hrawn ṭhin te hian Mizoram mipui min ti beidawng a, kan ram leh hnam hian a tuar phah hle niin a lang a ni ,” a ti bawk.
Vanlalhmuaka chuan sawi chhunzawmin, “Pu Narendra Modi kaihhruai sorkar term thumna tur chu a hma aia chak leh nasa in a piang leh dawn a, sorkarna siam turin tunah hian kan inbuatsaih mup mup a, India ram Congress-in kal ngaihna hrelo khawpa India mipuite an sawp hnuin, kum 2014 aṭang khan BJP sorkar Pu Modi-a kaihhruai chuan India mipuite chu ‘New Direction’ hmuh tirin, kum 10 chhunga mipuite tana an hnathawh rah avangin tun ṭum Lok Sabha Inthlanpui ah pawh hian a hma aia chakna zawkin sorkarna kan siam leh dawn a ni. Kan Sorkar leh chhan tur bulpui ber chu Mipuite hmaa kan intiamna; ‘Manifesto’ anga hna kan thawh vang a ni,” a ti bawk.
Lalramtiama State Core Group Member chuan Party Administration chungchang inhrilhfiahna hun a neiin, BJP ah chuan Ram hmangaihtu dik tak te tan chauh a ni a ti.
Inkhawmah hian BJP zawm thar mi pathum PC Lalbiakmawia, MNF Upa Wing-a GS leh midang pathum te chu BJP ah Vanlalhmuaka chuan a lawm lut bawk a ni.