Italian Serie A-ah hun rei tak hnuah AC Milan champion pui leh nawlhtu manager Stefano Pioli chuan season tawp rualin AC Milan a chhuahsan dawn.
Stefano Pioli hian October 2019 atang khan Italian club lian AC Milan a enkawl tan a, kum 11 zet Italian Serie A-ah an champion theih loh hnuin kum 2022 khan an champion leh ta nawlh. Milan a enkawl chhung hian champions league semi-final a hruai thleng bawk a. Semi-final-ah an tualchhunga an elpui lian Inter Milan an hneh lo. Season kal mekah pawh AC Milan hi Serie A-ah pahnihna a nihpui leh a. Champion thar Inter Milan aiin point 19 zetin an hniam zawk mek thung.
Kum 58 mi Pioli hian AC Milan ah kum 2025 thleng contract a la nei naa club thuneitute nen an indawr a, inhriatthiam tawnna in inthen an titlu a, Pioli hi season tawp hunah a chhuak dawn ta a ni. AC Milan hian inrinni zan Serie A 2023-24 an khel zo dawn a. Salernitana an hmachhawn tur chu Pioli hnuaia inkhel an hmachhawn hnuhnung ber tur a ni nghal dawn a. Hnehna nen an manager chhuak tur thlah ngei an tum ang.