Chief Minister Lalduhoma’n thalai ruihhlo ngaite a vei a, a kaihhruai sorkar lak luh tirah a tlawh hmasak ber pawh ruihhlo ngai enkawlna hmun a nih thu a sawi.
He thu hi inrinnia TNT dintu Sangthankima Padma Shree Award dawn lawmna inkhawmah a sawi a, Chief Minister chuan, ruihhlo ngaite a vei dan sawiin, a kaihhruai sorkar lak luh a nih khan ruihhlo ngai enkawlna hmun TBCC a tlawh nghal thu leh ruihhlo ngai chhanchhuah kawngah hma an la chho mek tih a sawi.
An hmalak dan sawi zawmin tunhnaiah pawh hun rei tak mumala lo thukhawm tawh ngai lo Ruihhlo Do Core Committee te an thut thu leh ruihhlo do kawnga na zawka hma lak dan turte an rel thu a sawi a, Central YMA in thahnem ngai taka hma an la chu lawmawm a tih thu a sawi a; rinna innghata ruihhlo ngai enkawlna in ten an thawh hlawk a, ramin a tangkaipui thu a sawi.
Duhima chuan tunhnaia Padma Shree Award dawngtu Sangthankima chu Pathianin a kohna ang taka hnathawktu a nih thu sawiin,”Pathian duh dan ang zela kalin Pathian a chawimawi tlat a, nasa takin Pathianin a chawimawi let ve ta a ni,” a ti a; TNT-a awm te chu an hotupa thu awih zel turin a chah.
Home Minister K. Sapdanga pawhin thusawiin, harsatna tawk mi sing tel lo enkawl tawhtu Pu Sangthankima hnathawh chu a ropui a tih thu leh a lawmman dawn pawh a phu ngawih ngawiha, ani tluka phu hi an awm bik chuanga a hriat loh thu a sawi a, an hnathawh ropui tak tak te avanga lawmthu hrilhin an kal zelna turah duhsakna a hlan a ni.
Thutak nunpuitu Team (TNT) dintu Sangthankima hian India rama civil mite chawimawina sang Padma Shree chu dawngin May ni 9 khan India president Droupadi Murmu in award hi a hlan a ni.
Sangthankima hian kum 1984 November ni 4 khan Champhai daiah a kalpui tan a. A hnuah Aizawl lamah insawnin Durtlangah bul an tan a, a hnuah tuna an awmna ram ah hian an awm leh ta a;TNT hian thalai chhanchhuah ngai mi 43,355, Pangpar huanah mi 2,414 leh fahrah 939 an lo enkawl tawh a ni.
Tun dinhmunah TNT ah hian Addict Centre pahnihah mi 840, Pangpar huanah mi 550 leh fahrah 340 an nei mek a. An enkawl zingah hian hnam dang engemawzat an tel. Aizawl pawn lamah Kolasib ah mi 367, Lungleiah 720, Champhaiah 320 leh Tahanah mi 250 an enkawl mek bawk. TNT atanga tha taka enkawl chhuah tawh TNT Team worker 94 an awm mek a ni.