German club lian Bayern Munich chuan an manager thar tur an zawng hmu ta a, Burnley manager ni mek Vincent Kompany nen inremna an nei thei ta. Bayern hian Kompany hi kum 2027 thleng cham turin an la lut dawn niin tarlan a ni.
German Bundesliga season tawp rualin Bayern Munich leh an manager Thomas Tuchel te an inthen nghal. Bayern hian Tuchel hmunruak luahtu tur an dap nasa hle a, an dawr hmasak pathumah hlawhtlinna an chang thei lo. Bundesliga leh German Cup-a Bayer Leverkusen champion puitu Xabi Alonso chu an manager thar ni tura an duh ber a ni a. Alonso hian club lian zawkte sawmna hnawlin Leverkusen-a cham chhunzawm a thlang.
Xabi Alonso an dawr hlawhchham hnuin an manager hlui, Germany national team enkawl mektu Jullian Nagelsmann an dawr zui leh a, an hlawhtling lo leh. Alonso leh Nagelsmann bakah hian Manchester United manager lailawk lo ni tawh leh Austria national team enkawl mek Ralf Rangnick an dawr leh a, an hlawhtling lo leh. Mi pathum ngawt an dawr hlawhchham hnuin Vincent Kompany lam an hawi a, Kompany nen hian inremna an nei thei ta a ni.
Bayern Munich leh Kompany te hi kum 2027 thleng daih contract ziak turin an inrem a. German club hian Burnley hnenah zangnadawmna £10.2m pek an remti. Bayern manager thar tur Kompany hian German Hamburg-ah kum hnih chhung a lo khel tawh a, EPL club lian Manchester City chu a ropuina hmun a ni. Player anga football a chawlhsan hnuin Anderlecht leh Burnley a enkawl tawh. Burnley hi EPL-ah kaisanpui mah English too-flight khel chhunzawm turin a himpui zo lova, championship lamah an tlahniam leh nghal. EPL-ah Burnley chetthatpui thei lo mah se club lian zawkte ngaihven a hlawh tlat thung a, Europe a club lian ber zinga mi Bayern Munich a enkawl dawn ta hial a ni.